Alaıaqtar ákimder men máslıhat depýtattarynyń atynan hat jaza bastady
TÚRKІSTAN. KAZINFORM- Áleýmettik jelide Kentaý qalasynyń ákimi men orynbasarynyń atynan jalǵan paraqshalar ashyldy. Onda alaıaqtar túrli jazbalar qaldyryp jatyr.
Kentaý qalasy ákimdiginiń habarlaýynsha Facebook, WhatsApp, Instagram, Messenger jáne Telegram paraqshalarynda Kentaý qalasynyń ákimi Jandos Tasovtyń jáne orynbasary Ǵalymjan Týlepovtyń atynan jalǵan habarlamalar jiberilip jatyr. Sondyqtan ákimniń fotosýreti qoıylǵan jasyryn nómirden qońyraý tússe nemese habarlama kelse, oǵan mán bermeý qajet.
«Internet alaıaqtar jalǵan jazbalar jiberýde. Sizderden jalǵan aqparatqa senip, beıtanys nómirge aqsha aýdarmaýlaryńyzdy suraımyz. Sondaı-aq kúmándi siltemelerge ótpeńizder» - delingen ákimdik tarapynan taratylǵan aqparatta.
Al, qala ákimi Jandos Tasov qazirgi tańda feık paraqshany qoldanýshyny anyqtaý maqsatynda quzyrly organdarǵa aryz jazylǵanyn jetkizdi.
«Zań aıasynda jaýapkershilikke tartylatyn bolady. Sondyqtan, feık paraqshadan jazylǵan qandaı da bir ótinish nemese tapsyrmaǵa, bopsalaýǵa aldanyp qalmaýlaryńyzdy suraımyn»-dep jazdy ol jelidegi resmı paraqshasynda.
Túrkistan qalalyq máslıhatynyń depýtaty Baǵdáýlet Turmanovtyń da búgin jelide jalǵan paraqshasy paıda bolǵan. Bul jaıynda pikir bildirgen depýtat, alaıaqtar jeke fotosyn paıdalanyp jalǵan paraqsha ashqanyn aıtty. Sondaı-qa, kópshilikti alaıaqtardan saq bolýǵa shaqyrdy.
