Alaıaqtar 4 kúnde 150 myń SMS taratyp, azamattardyń aqshasy men jeke deregin ıemdenbek bolǵan
ASTANA. KAZINFORM — Qarjylyq monıtorıng agenttigi azamattardyń jeke derekteri men aqshasyn ıemdený maqsatynda fıshıng habarlamalaryn jappaı taratqan qylmystyq toptyń áreketin áshkereledi.
Tergeý derekterine sáıkes, bıyl qańtar aıynda Ońtústik-Shyǵys Azııa elderiniń biriniń azamaty Qazaqstan Respýblıkasynyń aýmaǵynda zańsyz áreket uıymdastyrý úshin jergilikti turǵyndy aqshalaı syıaqyǵa tartqan.
Keıin qylmystyq shemaǵa Astana qalasynda jabdyqtyń jumysyn qamtamasyz etken basqa da adamdar qosylǵan.
— Kúdiktiler SMS-blaster qoldanǵan. Bul — uıaly baılanys bazalyq stantsııasynyń jumysyn ımıtatsııalap, operatorlardyń súzgileý júıelerin aınalyp ótý arqyly habarlamalardy jappaı taratýǵa múmkindik beretin qurylǵy. Nátıjesinde tórt kún ishinde Beeline, Kcell jáne Activ operatorlarynyń abonentterine belgili kompanııalardyń atynan bonýstardy aıyrbastaý týraly usynystar jazylǵan shamamen 150 myń fıshıng SMS-habarlama jiberilgen. Siltemege ótken qoldanýshylar jalǵan saıtqa baǵyttalyp, onda olardan jeke jáne bank derekterin, onyń ishinde tólem kartasynyń derektemelerin, CVV-kodty jáne SMS arqyly keletin rastaý kodyn engizý suralǵan. Osylaısha kúdiktiler azamattardyń qupııa aqparaty men bank shottaryndaǵy qarajatyna qol jetkizgen.
Tergeý barysynda tárkilengen SMS-blaster jedel-izdestirý is-sharalary men jasyryn tergeý áreketterin júrgizýge arnalǵan arnaıy tehnıkalyq qural ekeni anyqtalǵan.
Atalǵan derek boıynsha Qylmystyq kodekstiń 399-baby 2-bóligi «Aqparatty jasyryn alýǵa arnalǵan arnaıy tehnıkalyq quraldardy zańsyz daıyndaý, óndirý, satyp alý, ótkizý nemese paıdalaný» boıynsha sotqa deıingi tergep-tekserý bastaldy.
Qazirgi ýaqytta tórt kúdikti qamaýǵa alyndy.
Tergeý jalǵasyp jatyr.
Ózge aqparat Qazaqstan Respýblıkasy Qylmystyq-protsestik kodeksiniń 201-babyna sáıkes jarııa etilmeıdi.
