Alaıaqtar 2 myń qazaqstandyqtyń atynan onlaın nesıe alǵan

NUR-SULTAN. QazAqparat – Jyl basynan beri ınternet-alaıaqtar 2 myń adamnyń derbes derekterin urlap, sonyń negizinde onlaı nesıeler resimdegen, dep habarlaıdy QazAqparat tilshisi.

Іshki ister mınıstrliginiń resmı ókili Nurdildá Oraz vedomstvonyń aqparat alańynda ótken onlaın brıfıngide osyndaı málimet taratty.

«Alaıaqtardyń ǵalamtor arqyly jasaıtyn aılasy kún saıyn túrlenip jatyr. Polıtsııa saq bolý qajettigin qansha eskertse de, san soǵyp qalyp jatqandar jeterlik. 9-15 tamyzy aralyǵynda respýblıka aýmaǵynda aqparattyq tehnologııalardy qoldaný arqyly jasalǵan qylmystardyń, onyń ishinde ınternet-alaıaqtyqtyń aldyn alýǵa, ashýǵa jáne jolyn kesýge baǵyttalǵan «Alaıaqtyqqa qarsy» jedel-profılaktıkalyq is-sharasy ótkizildi. Nátıjesinde bir apta ishinde 270 zańbuzýshylyq anyqtaldy. Sonyń ishinde túrleri boıynsha: ınternet qoldanýshylarǵa qarsy alaıaqtyq – 230, aqparattyq tehnologııalardy qoldaný arqyly urlyq jasaý – 6, aqparatqa zańsyz qol jetkizý - 4, qylmystyń basqa 30 túri tirkeldi», - dedi Nurdildá Oraz.

Sondaı-aq ol, osy shara kezinde buryn jasalǵan 433 qylmystyń beti ashylǵanyn atady.

«Internetke júrgizilgen monıtorıngte zańsyz kontenti bar 664 resýrs anyqtaldy. Jalpy, jyl basynan beri ishki ister organdary ınternet-alaıaqtyqtyń 13 myńnan astam faktisin tirkedi. Olardyń 5000-y alaıaqtardyń onlaın saýda alańdary men veb-saıttarda ornalastyrǵan jarnamalaryna negizdelgen faktileri boıynsha qozǵaldy. 2000 alaıaqtyq azamattardyń jeke málimetterin alyp qoıýmen baılanysty, olardyń atynan onlaın nesıe keıin tirkelip otyrǵan. Mobıldi bankıng arqyly aqshasy urlanǵan azamattardyń jeke derekteri men kartochkalyq shottarynyń derektemelerin alý arqyly myńnan astam alaıaqtyq jasaldy», - dedi Іshki ister mınıstrliginiń resmı ókili.

Sondaı-aq, ІІM Ákimshilik polıtsııa komıteti tóraǵasynyń orynbasary Jandos Muratálıev kóshede kóliktegi mýzykany qatty oınatý qanshalyqty zańdy áreket ekenin túsindirdi.