Alaıaqtar 1 mlrd teńgege jalǵan krıptovalıýta satqan - mınıstr
NUR-SULTAN. QazAqparat - Alaıaqtar 1 mlrd teńgege jalǵan krıptovalıýta satqan. Bul týraly búgin QR Іshki ister mınıstri Erlan Turǵymbaev esep berý kezdesýi barysynda aıtty, dep habarlaıdy QazAqparat tilshisi.
«Oqshaýlaný rejımi kezinde qashyqtan satyp alý, onlaın qyzmetter tájiribıesiniń taralýy ınternet alaıaqtar sanynyń eselep ósýine sep bolǵandyǵyn atap ótken oryndy», - dedi mınıstr Ortalyq kommýnıkatsııalar qyzmetinde ótken kezdeýde.
Onyń atap ótýinshe, mundaı qylmystardy ashýmen elimizdi Іshki ister mınıstrligi qurylymynda jumys jasaıtyn Kıberqylmyspen kúres ortalyǵy aınalysady.
«Kúni keshe ǵana Almatyda ınternet-alaıaqtyq shemasyn uıymdastyrǵan top áshkere boldy. Qylmyskerler jalǵan krıptovalıýta aınalymǵa engizip, 800-ge jýyq azamattyń 1 mlrd teńgeden astam aqshasyn ıelenip ketken. Osyǵan baılanysty azamattarymyzdy elektrondy tólemdermen operatsııa jasaý barysynda barynsha saq bolýǵa shaqyramyn», - dedi Erlan Turǵymbaev.
