Alaıaqqa senip qalǵan BQO turǵyny 11 mln teńgesinen aıyryldy
Polıtsııaǵa shaǵymdanǵan 1975 jylǵy jábirlenýshiniń sózine qaraǵanda, ózin «bank qaýipsizdik qyzmetiniń qyzmetkeri» dep tanystyrǵan belgisiz adam qońyraý shalǵan.
«Sóılesý barysynda alaıaq jábirlenýshiniń senimine kirip, esepshotyndaǵy qarajatyn saqtap beremin dep aldaǵan. Onyń jalǵan sózine sengen turǵyn onlaın bankıngte nesıe resimdep, qońyraý shalýshyǵa 4 750 myń teńgeni aýdarǵan. Sodan keıin basqa eki bankten 4,5 mln teńge jáne 2 mln teńge nesıe rásimdep, qarajattardy alaıaq kórsetken shotqa aýdaryp jibergen. Atalǵan derek boıynsha QR QK 190-baby 3-bóligine (alaıaqtyq) sáıkes qylmystyq is qozǵaldy, – dedi BQO PD krımınaldyq polıtsııa basqarmasynyń bastyǵy, polıtsııa podpolkovnıgi Sultan Shaldarbekov.
Ádette, mundaı jaǵdaılarda qarjy sheteldik bankterdiń shottaryna aýdarymdar tizbegi boıynsha ketedi jáne sol jerde qolma-qol aqshaǵa aınalady. Sondyqtan mundaı qylmystardy ashý qıyn jáne alaıaqqa ketken aqshany qaıtarý is júzinde múmkin emes.
Oral qalasynyń taǵy bir turǵyny «OLX» saıty arqyly jarnamalanǵan qymbat emes, biraq sapasy jaqsy delingen jıhazǵa tapsyrys bergen. Alaıda 600 myń teńgesin aýdarǵannan keıin aqshasyn da, jıhazyn da ala almaǵan. Jarnamalaýshy da taptyrmaǵan. Aqyry aldanǵanyn túsingen ol polıtsııaǵa júgingen. Bul derek boıynsha QR QQ 190-baby 2-bóligine (alaıaqtyq) sáıkes sotqa deıingi tergeý amaldary júrgizilýde.
Polıtsııa qyzmetkerleri jábirlenýshi aqsha aýdarǵan belgisiz adamnyń Pavlodar qalasynda bolǵanyn anyqtady. Ókinishke qaraı, kúdiktiniń kim ekenin anyqtaý jáne ustaý múmkin bolmaı tur.
«Mundaı derekter az emes. Alaıaqtar jıhaz, ınterer zattaryn, arzan baǵamen jalǵan buıymdardy jasaý, bólshekter men taýarlarǵa tapsyrys berý sekildi túrli qyzmetti usynady jáne árkez aldyn ala tólem jasaýdy suraıdy. Taýarlar men qyzmetterge aldyn ala tólem jasamaý qajet. Qyzmet kórsetilip, taýarlardy jetkizgennen keıin ǵana esep aıyrysqan jón», dep habarlady vedomstvodan.