Alaıaq Taldyqorǵan stýdentterin 24 mln teńgege aldaǵan

TALDYQORǴAN. QazAqparat – Jetisý oblysynyń turǵyndaryn 24 mln teńgege san soqtyrǵan alaıaqqa qatysty sot bastaldy, dep habarlaıdy QazAqparat Polisia.kz-ke silteme jasap.

Taldyqorǵan qalasynda alaıaqtyqtyń birneshe faktisi boıynsha 41 jastaǵy áıelge qatysty sot protsesi bastaldy.

Qylmystyq is materıaldarynda jábirlenýshi retinde 16 adam kórsetilgen, olardyń negizgi bóligi 20-23 jas aralyǵyndaǵy jergilikti joǵary oqý oryndarynyń stýdentteri.

«Taldyqorǵan qalalyq polıtsııasynyń qyzmetkerleri alaıaqtyq jasady degen kúdikke ilingen áıeldi ótken jyldyń sońynda ustaǵan. Oǵan qatysty «eshqaıda ketpeý» jáne «ózin durys ustaý týraly qolhat alý» bultartpaý sharasy tańdaldy.

Tergeý materıaldaryna sáıkes, dáleldengen derek boıynsha jábirlenýshilerge keltirilgen zalal 24 mln teńgeden asty.

Aqshalaı nemese taýarlyq nesıeler mıkrokredıttik uıymdar men ekinshi deńgeıli bankter arqyly resimdelgen», - delingen polıtsııa málimetinde.

Kúdiktiniń is-áreketteri QR Qylmystyq kodeksiniń 190-baby 3-bóliginiń 4-tarmaǵy boıynsha (Alaıaqtyq) saralanyp otyr.

Sot úkimi shyqqan joq. Degenmen, kúdiktiniń qurbandary qysqa merzimde dálelder jınap, isti Femıda ókilderiniń qaraýyna jibergen qalalyq polıtsııa tergeýshisine alǵys bildirdi.

«Osy faktige qatysty qoǵamnyń narazylyǵyn eskere otyryp, qylmystyq isti tergeý oblystyq polıtsııa men qadaǵalaý organynyń erekshe baqylaýynda boldy. Іsti sotqa jibergennen keıin jábirlenýshiler qoǵam narazylyǵyna ilingen isti tergep-tekserýde obektıvtilik tanytqany úshin tergeýshi Nadııa Nuralınovaǵa alǵysyn bildirdi», – dedi Taldyqorǵan qalasy PB bastyǵynyń orynbasary Shyńǵys Nurahımov.