Alaıaq ınternet arqyly 15 adamdy qant satamyn dep aldaǵan

NUR-SULTAN. QazAqparat – Almatylyq alaıaq olx.kz arqyly 15 adamǵa «qant satqan. Bul týraly Krımınaldyq polıtsııa departamenti Kıberqylmysqa qarsy kúres ortalyǵynyń bastyǵy Jandos Súıinbaı málim etti, dep habarlaıdy QazAqparat tilshisi.

«Óńirlerdegi túzetý mekemelerinde jasalatyn kıber alaıaqtyqtyń aldyn alý jumystary jalǵasýda. Mysaly, Qaraǵandy oblysynyń kıber qylmyspen kúres bólimshesiniń ýákilderi Qylmystyq atqarý júıesi komıtetiniń ókilderimen birge qylmyskerdiń jolyn kesti. Almaty oblysyndaǵy túzetý mekemesinde alaıaqtyǵy úshin jazasyn ótep jatqan azamat uıaly gadjet arqyly ınternet-alaıaqtyqqa barǵan. Naqtyraq aıtsaq, áleýmettik jeli arqyly taýar men qyzmet usynýshylardy taýyp, solardyń senimine kirý arqyly mesendjer-chattarǵa múshe bolady. Sol chattardyń kómegimen ózin jelini qoldanýshynyń tanysy nemese áriptesi retinde tanystyryp,qaryzǵa aqsha suraǵan», - dedi ol onlaın brıfıngide.

Kúdiktiniń bul áreketinen Qaraǵandy, Atyraý, Aqtóbe jáne Qyzylorda oblystarynda 30 adam zardap shekken.

«Sondaı-aq Almaty qalasy polıtsııa departamentiniń krımınaldyq saqshylary eldegi qant tapshylyǵyn paıdalanyp, Olx.kz saıty arqyly alaıaqtyq jasaǵan adamdy anyqtady. Ol ınternette kóterme jáne bólshek saýdada qant satatyny týraly jalǵan habarlandyrýlar salyp otyrǵan. Alaıda aqsha qolyna tıgen boıda habarsyz ketip otyrǵan. Osyndaı 15 epızod anyqtaldy. Ol qazir qamaýda», - dedi ortalyq bastyǵy.