Alaıaq degen kúdikke ilingen Qazaqstan azamatshasy Bolgarııadan ekstradıtsııalandy

ASTANA. QazAqparat - Alaıaqtyq jasaýda kúdikti bolǵan qazaqstandyq áıel Bolgarııadan ekstradıtsııalandy, dep habarlady QR Bas prokýratýrasynyń baspasóz qyzmeti.

«17 qarasha kúni tańǵy 5-te Bas prokýratýra jáne QR Іshki ister mınıstrliginiń qyzmetkerleri halyqaralyq izdeýde bolǵan Qazaqstan azamatshasyn ekstradıtsııalady. Almaty q. ІІD asa iri kólemde birneshe alaıaqtyq jasaǵan 42 jastaǵy K.-ge izdeý jarııalaǵan», - delingen habarlamada.

2007-2010 jyldary K. aldaý jáne senimdi asyra paıdalaný jolymen ózine sengen azamattardan AQSh-tan kólik ákep beremin dep 26 mıllıon teńge jınaǵan. Qazirgi ýaqytta aıyptalýshy Astana qalasynyń tergeý ızolıatoryna qamaýly.