Alaıaq BQO turǵyndaryn 200 mln teńgege otyrǵyzyp ketken

ORAL. KAZINFORM — BQO polıtsııa departamenti krımınaldyq polıtsııa basqarmasynyń qyzmetkerleri Túrkistan oblysynyń 32 jastaǵy turǵynyn ustady.

BQO polıtsııa departamentiniń baspasóz qyzmetinen málim etkenindeı, alaıaq Oral qalasynyń birneshe turǵynyn aldap, joq bızneske qarjy salýdy usynyp, olardyń 200 mln astam teńgesin ıemdenip ketken.

Aldymen ol áıelmen áleýmettik jeli arqyly tanysqan. Ózin kórshiles elderge aıfon telefondaryn kóterme saýda baǵasymen satýmen aınalysatyn kásipker retinde tanystyryp, senimine kirgen.

— Alaıaq áıelge joǵary tabys tabasyń dep ýáde berip, qarjy salýdy usynǵan. Áıel oǵan eki páterdi satýdan túsken qarjysyna jınaǵan aqshasyn qosyp bergen. Keltirilgen zalal 77 mln teńgeden asqan. Sonymen qatar alaıaqtyń quryǵyna jábirlenýshiniń týysqandary men tanystary túsken. Qazirgi kezde alaıaqtyqtyń alty epızody boıynsha tergeý amaldary júrgizilip jatyr. Kúdikti qarjyny óz muqtajyna jumsaǵan, býkmekerlik keńselerde bás tigip, utylǵan. Ol ýaqytsha ustaý ızolıatoryna qamaldy, — dep habarlady vedomstvodan. 

Eske sala keteıik, budan buryn Oralda 13 adamǵa 56,5 mln teńge zalal keltirgen áıeldiń sottalǵanyn jazǵan bolatynbyz.