Alaıaq áıel túrkistandyqtardy 11 mln teńgege aldap ketken
TÚRKІSTAN. QazAqparat – Túrkistan qalasynda alaıaqtyq jolmen turǵyndardy qyrýar aqshaǵa qaryzǵa batyrǵan áıel ustaldy. Qazirgi tańda kúdiktiniń birneshe azamatqa 11 mln teńge kóleminde shyǵyn keltirgeni anyqtalyp otyr, dep habarlaıdy QazAqparat tilshisi.
Oblystyq Polıtsııa departamenti baspasóz qyzmetiniń málimetinshe, Túrkistan qalalyq polıtsııa basqarmasyna jergilikti turǵyn aryzdanyp kelgen. Ol kúdikti áıelge 1 mıllıon teńge kóleminde nesıe alyp bergenin aıtqan. Alaıda ol aıtqan ýádesinde turmaı, qashyp ketken. Polıtsııa qyzmetkerleri jedel is-sharalaryn júrgizip, kúdiktini qolǵa túsirgen. Ol oblys ortalyǵynyń turǵyny ekeni anyqtaldy.
Tergeý barysynda alaıaq áıel Túrkistan qalasynyń taǵy 8 turǵynyn aldap, jalpy kólemi 11 mıllıonǵa jýyq teńgeni ıemdengeni dáleldengen.
«Atalǵan jaıttardyń barlyǵy tirkeýge alynyp, QR QK-niń 190-baby «Alaıaqtyq» boıynsha sotqa deıingi tergep-tekserý amaldary jalǵasýda. Kúdikti áıel búginde qamaýda. Qalalyq polıtsııa basqarmasynyń polıtseıleri kúdiktiniń osyǵan uqsas basqa da qylmystarǵa qatysy bolýy múmkin ekendigin aıtýda», - delingen habarlamada.
