Alaıaq áıel almatylyqtarǵa jalaqysy joǵary jumys ýáde etken
ALMATY. QazAqparat – Almaty qalasynyń polıtseıleri Áýezov aýdandyq polıtsııa basqarmasynyń qyzmetkerleri turǵyndardan alaıaqtyq jolmen aqsha alǵan áıeldi ustady, dep habarlaıdy QazAqparat tilshisi.
«1985 jyly týǵan 35 jastaǵy C. esimdi áıel buryn qylmystyq jaýapkershilikke tartylǵan. Shilde aıynyń ortasynda ol Abaı dańǵylymen Saın kóshesiniń qıylysynda turyp, sengish turǵyndarǵa jaqyndap, «jumys qajet pa?» dep suraqtaryn qoıǵan. Áıel karantındi, keıbir adamdardyń qazir jumystan bosatylǵanyn jáne ýaqytsha jumys izdeýi múmkin degen faktorlardy paıdalanǵan. Ol jaqsy psıholog. Zardap shekkenderdi áńgimege jyldam tartyp, joǵary jalaqy tólenetin munaı kompanııasyna jumysqa turǵyzýǵa kómek kórsete alatynyn aıtqan. Qyzmetteri úshin olardan syıaqy alǵan. Biraq keıinnen aqsha da, jumys ta joq. Qazirgi ýaqytta bizdiń bólimge eki adam osy jaǵdaı boıynsha júgindi», – dedi Áýezov aýdandyq polıtsııa basqarmasynyń bastyǵy Álisher Tursynbetov.
Sonymen qatar, polıtsııa kúdikti qalanyń basqa da aýdandarynda zańǵa qaıshy áreketter jasaýy múmkindigin joqqa shyǵarmaıdy.
Zardap shekkender bolsa: 8-701-852-60-94, 8-707-515-47-35 telefon nómirlerine habarlasýdy suraıdy.
