Alaıaq áıel almatylyqtardy 300 mln teńgege aldady

ALMATY. QazAqparat - Tenderdi jeńip alýǵa kómektesetinin aıtqan alaıaq áıel almatylyqtardy 300 mln teńgege aldap ketken, dep habarlaıdy QazAqparat tilshisi.

Almaty qalalyq Polıtsııa departamentiniń málimetinshe, Áýezov aýdanynyń tártip saqshylary alaıaqtyq jasaǵany úshin 37 jastaǵy S. esimdi áıeldi ustady.

«Qylmystyq is materıaldaryna sáıkes, kúdikti «jaqsy tanystaryna» silteme jasaı otyryp, azamattarǵa tenderlerge qatysýǵa jáne jeńiske jetýge ýáde bergen. Qazirgi ýaqytta S. esimdi áıeldiń qatysy bar 5 qylmystyq is tergelip jatyr. Jábirlenýshilerge keltirilgen materıaldyq shyǵyn kólemi 300 mln teńgege jetti», – dedi Áýezov aýdandyq PB bastyǵy Ulan Ábilqaıyr.

Polıtsııa ókiliniń aıtýynsha, kúdikti qazir qamaýda otyr. Sotqa deıingi tergeý jalǵasyp jatyr.

Kúdiktiniń basqa da epızodtarǵa qatysy bar-joǵy anyqtalýda.