Alaıaq aýyl turǵyndarynyń atyna nesıe alǵan - SQO
PETROPAVL. QazAqparat – Petropavl qalalyq polıtsııasyna alaıaqtyń áreketinen zardap shekken birneshe aýdan turǵyny júgingen, dep habarlaıdy QazAqparat tilshisi.
SQO Polıtsııa departamenti baspasóz qyzmetiniń málimetinshe, zardap shekkender ózderiniń atyna alaıaq nesıe resimdegeni týraly bilmegen. Polıtseıler teksere kele barlyq jaǵdaıda kúdikti «Okean» saýda orny jáne kóterme saýda ortalyǵy mańynda áreket etkenin anyqtady. Alaıaq aýyl turǵyndaryn nysanaǵa alyp, aram oıyn júzege asyrý úshin olardy áńgimege tartyp, senimine kirgen.
«Jaqynym syrqattandy», «qujattarym joǵaldy» syndy túrli jalǵan sózderge sengen aýyl turǵyndary alaıaqqa onyń esepshotyndaǵy aqshany alyp berý úshin ózderiniń qujattaryn bergen. Solaısha, kómektespek bolǵan. Alaıaq olardy «Sreditomat.kz» fırmasynyń termınaldaryna aparyp, olardyń atyna jyldam nesıe resimdegen. Fotoǵa túsý qajet bolǵan kezde adamdardy avtomatqa shaqyryp otyrǵan. Jábirlenýshilerdiń birde-bireýi bul kompanııa jáne termınaldarynyń jumysy týraly bilmegen eken», - deıdi Petropavl qalalyq PB Ekinshi polıtsııa bólimi bastyǵynyń orynbasary Gúlmıra Saǵıtova.
Jedel-izdestirý is-sharalary barysynda osy qylmysqa qatysy bolýy múmkin 1981 jylǵy Petropavl qalasynyń turǵyny anyqtaldy. Ol buryn múliktik qylmystar jasap, birneshe ret jaýapqa tartylǵan. Atalǵan fakti «Alaıaqtyq» baby boıynsha Sotqa deıingi tergep-tekserýdiń biryńǵaı tizilimine engizildi. Kúdiktige qatysty qamaqqa alý túrindegi bultartpaý sharasy taǵaıyndaldy.
Polıtseıler alaıaqtyń qurbanyna aınalmas úshin jeke qujattar men málimetterdi bireýge berýge, nesıe beretin belgisiz termınaldardy paıdalanýǵa bolmaıtynyn eskertedi.
