Alaıaq Astana turǵynyn «vıtse-mınıstr kómekshisimin» dep aldap, 65 mln teńge para bergizgen

ASTANA. KAZINFORM — Astanada jaýapkershiligi shekteýli seriktestiktiń kommertsııalyq dırektory alaıaqtyq jáne para berýge ıtermelegeni úshin sottaldy.

1 tamyzda Astana qalasynyń qylmystyq mamandandyrylǵan aýdanaralyq soty JShS dırektory K-ǵa asa iri mólsherde alaıaqtyq jasaǵany jáne asa iri mólsherde para berýge ıtermelegeni úshin úkim shyǵardy.

K. 2021 jyldyń sáýirinde M-ny sheneýnikterge para berýge ıtermeleý jáne aldaý, senimge qııanat jasaý arqyly onyń aqshasyn qolǵa túsirý maqsatynda «qarjy vıtse-mınıstriniń kómekshisimin» dep aldap, «A» jáne «AS» JShS úshin tólengen salyqtyń kórsetkishin ulǵaıtý máselesin sheshý úshin Qarjy mınıstrliginiń laýazymdy tulǵalaryna 65 mln teńge somasynda aqsha berý qajettigin aıtyp sendirgen.

Osylaısha, K. paıdakúnemdik nıetpen áreket ete otyryp, 65 mln teńge somasynda aqshalaı qarajatty oıdan shyǵarylǵan mindettemelerdi oryndamaı ıemdenip áketken.

Bul rette M-ǵa aqshalaı qarajatty Qarjy mınıstrliginiń laýazymdy tulǵalaryna bergenin habarlaǵan.

Sottalýshynyń kinási kýágerlerdiń aıǵaqtarymen, jasyryn tergeý áreketteriniń nátıjelerimen, saraptamalardyń qorytyndylarymen, sondaı-aq qylmystyq istiń basqa da materıaldarymen dáleldendi.

Sotta prokýror aıyptalýshyny 11 jylǵa bas bostandyǵynan aıyrýdy surady. 

Sottalýshy K. kinásin moıyndamady, sottalýshynyń ózi jáne onyń qorǵaýshylary sottan ony kinásiz dep tanýdy jáne aqtaýdy surady.

QK 190-babynyń 4-bóligi boıynsha múlki tárkilenip, belgili bir laýazym atqarý nemese belgili bir qyzmetpen aınalysý quqyǵynan 10 jylǵa deıingi merzimge aıyra otyryp nemese onsyz 5 jyldan 10 jylǵa deıin  bas bostandyǵynan aıyrý jazasy qarastyrylǵan. 

QK-niń 367-babynyń 4-bóliginiń sanktsııasy — múlki tárkilenip, belgili bir laýazym atqarý nemese belgili bir qyzmetpen aınalysý quqyǵynan ómir boıyna aıyra otyryp, paranyń 50-60 eselengen somasy mólsherinde aıyppul salýǵa ne 10 jyldan 15 jylǵa deıingi merzimge bas bostandyǵynan aıyrý.

Іs boıynsha sottalýshynyń jaýapkershiligi men jazasyn jeńildetetin jáne aýyrlatatyn mán-jaı belgilenbegen.

Búkil mán-jaıdy eskere otyryp, sot úkimimen K. QK-niń 190-baby 4-bóliginiń 2-tarmaǵy, 28-babynyń 4-bóligi, 367-babynyń 4-bóliginde kózdelgen qylmysty jasaǵany úshin kináli dep tanylyp, qylmys jıyntyǵy boıynsha memlekettik qyzmette jáne kvazımemlekettik sektor sýbektilerinde laýazym atqarý quqyǵynan ómir boıyna aıyryla otyryp, 10 jyl merzimge bas bostandyǵynan aıyryldy.

Úkim zańdy kúshine engen joq.