Alaıaq áleýmettik jelidegi fotosýretter arqyly bóten adamdarǵa 50 nesıe rásimdegen

NUR-SULTAN. QazAqparat – QR ІІM Krımınaldyq polıtsııa departamenti bastyǵynyń orynbasary Qanat Nurmaǵambetov zańsyz onlaın nesıeler qalaı rásimdeletinin aıtty, dep habarlaıdy QazAqparat tilshisi.

«Internet alaıaqtardy anyqtaý boıynsha bıylǵy 9-11 aqpan aralyǵynda «Anti-Fraud» operatsııasy ótkizildi. Úsh kúnde 300-den astam qylmys tirkelip, buryn jasalǵan 289 alaıaqtyq qylmysy ashyldy. Alaıaqtyqtyq kóp taraǵan túri – ol ınternet alańdarda taýar satý nemese qyzmet kórsetýge baılanysty. Olar taýar baǵasyn tómen baǵamen belgileıdi, sondaı-aq qyzmet kórsetý qunyn tómendetip kórsetedi. Alaıaqtar taýar satyp alýshylarǵa bóten adamnyń atyna rásimdelgen shottarǵa tólemdi tolyqtaı nemese ishinara jasaýdy suraıdy», - dedi Q. Nurmaǵambetov onlaın rejımdegi brıfıngide.

Onyń aıtýynsha, mıkronesıelik uıymdarda onlaın qaryzdardy zańsyz rásimdeý jıilep ketti. Qylmyskerler ınternet arqyly azamattardyń jeke málimetterin alýǵa tyrysady.

«Shymkent qalasynyń turǵyny áleýmettik jelilerde tabylǵan jeke qujattar týraly habarlandyrýlardy izdegen. Jeke kýálik fotosýretterinen tıisti málimetterdi alǵannan keıin, túrli oblystar turǵyndarynyń atyna 50-ge tarta onlaın nesıe rásimdegen», - dedi Krımınaldyq polıtsııa departamentiniń ókili.

Sonymen qatar ol bank kartalary men depozıtterdegi qarjyny zańsyz ıemdený úshin jeke málimetterdi alýdyń basqa da tásilderi tirkelip jatqanyn aıtty.

Budan buryn habarlanǵandaı, qylmystardyń jalpy aýqymynda 10 paıyzdan astamy alaıaqtyqqa tıesili.

«Pandemııa kezinde álemde qabyldanǵan shekteýler qoǵamdaǵy máseleler men mindetterdiń kóbisin ınternet jelisi arqyly sheshýge úıretti. Degenmen kıberqylmystar sany da jıilep ketti, onyń ishinde ınternet alaıaqtyq jaǵdaılary kóbeıdi. Ótken jyly mundaı 14 myń qylmys jasalsa, al bıyldyń qańtar aıynda 1700-den asyp tústi», - dedi Q. Nurmaǵambetov.