Alaıaq 50 paıyzdyq jeńildik jasaımyn dep zeınetkerlerdi aldap soqty
ASTANA. 20 shilde. QazAqparat - Petropavl qalasynyń jáne Qyzyljar aýdanynyń 40-qa jýyq turǵyny alaıaqtyń toryna tústi,
dep habarlady SQO ishki ister departamenti baspasóz qyzmetinen.
Vedomstvonyń atap ótýinshe, jábirlenýshilerdiń kópshiligi zeınetkerler. Tómen baǵamen plastıkalyq tereze ornatamyz degen alaıaq, turǵyndardy aldap, aqshalaryn alyp ketken. «Aktsııa! «Eko plast» jaýapkershiligi shekteýli seriktestigi 50 paıyzdyq jeńildikpen plastıkalyq tereze ornatady» degen habarlandyrýdy kórgen turǵyndar óz páterlerine tereze ornatpaqshy bolǵan. Sonymen qatar zeınetkerlerge qosymsha taǵy da 10 paıyzdyq jeńildik qarastyrylǵan eken. Tómen baǵamen tereze ornatýmen aınalysatyn fırma Jumabaev kóshesinde ornalasqan. Barlyǵy shyndyqqa saı kelgen. Jalǵa alynǵan bólmede tórt jumysshy bolǵan. Olar kelsim-shart jasap, tapsyrystar qabyldap, qajetti qujattar daıyndap, aqsha qabyldaýmen aınalysqan. Kelsim-shartqa sáıkes klıentter terezeniń jarty qunyn tólegen soń bir aptadan keıin tereze ornatylatyn bolǵan. Tapsyrys berýshilerdiń úılerine ólsheýshi jiberilgen.
Alaıda kópten kútken terezelerin eshkim de kórgen joq. Tereze ornatatyn ýaqyt kelgende, atalmysh fırma óz jumysyn toqtatqan. Aılaker óziniń jalǵan fırmasyna jumysqa alǵan qyzmetkerlerdi de aldap ketken eken. Jumysshylardy jaldaǵan adam ózin almatylyq «Eko plast» fırmasynyń qyzmetkerimin dep tanystyrǵan, Petropavlda fırmanyń ókildigin ashyp jatqandyǵyn aıtqan.
Jumysshylar bolsa, bastyqtarynyń jymysqy oıyn ańǵarmaı qalǵan. Alaıaq kúnde keshkisin jınalǵan aqshany alyp ketip otyrǵan, al sońǵy ret barlyq qujattardy áketken. Qazirgi ýaqytta jábirlenýshiler seziktini sýreti boıynsha tanyp otyr. Búgingi kúni Petropavl qalalyq ІІB-na 40-tan astam aryz kelip tústi. Tártip saqshylary kúdiktini izdestirý sharalaryn jalǵastyrý ústinde. Qylmyskerdiń keltirgen shyǵyny 1,5 mıllıon teńgege jetedi.
