«Alaý» muz saraıynda konkımen júgirý sportynan Álem kýbogy ótedi
ASTANA. 6 qarasha. QazAqparat - 29 qarashada «Alaý» muz saraıynda konkımen júgirý sportynan Álem kýbogy ótedi. Álemniń 30 memleketiniń 200 úzdik sportshysy, álemdik juldyzdar, Olımpıada júldegerleri men Álem chempıondary Astanada Olımpıada lıtsenzııalaryn sarapqa salady. Sochı-2014 Olımpıadasynda 10 000 metr qashyqtyqtaǵy jarysqa irikteý «Alaý» muz saraıynda ótedi. Bul týraly muz saraıynyń baspasóz qyzmetine silteme jasap astana.kz habarlady.
«Qazaqstan quramasy men álemdik juldyzdar konkımen júgirýden kúsh synasady. Olımpıada oıyndaryna irikteý barǵan saıyn qıyndap keledi. Básekelestik artýda. Sochıde 10 000 metr qashyqtyqta jarysqa qatysý úshin Álem kýbogynda úzdik 16 sportshynyń qataryna ený kerek», - delingen habarlamada.
«Alaý» saraıyndaǵy muzdyń sapasyn jáne sportshylardyń Olımpıada qarsańyndaǵy asa joǵary deńgeıdegi daıyndyqtaryn eskere kele, elordada jańa álemdik rekordtardyń ornatylýy sekildi tarıhı oqıǵanyń kýási bolýymyz ábden múmkin.
Qazaqstan quramasynan elimizdiń úzdik staıeri Dmıtrıı Babenko baǵyn synaıdy, ol Álem kýbogy kezeńderiniń serııasy bastalmas buryn Kanadada 3 000 metr qashyqtyqta ulttyq rekord ornatqan bolatyn.
Aıdyn ıesi retinde Qazaqstan quramasy ár qashyqtyqta bes-bes sportshydan qatystyra alady. Bul bapkerler shtabyna ulttyq shtattyq komandany Olımpıadalyq lıtsenzııalarǵa kúres barysynda barynsha áreket etýge múmkindik beredi.
Eske sala keteıik, el quramasynyń bas bapkeri Vadım Saıýtın oıyndarda 5-6 lıtsenzııa men bir medalǵa qol jetkizetinderin aıtqan bolatyn. Qurama sapynda qazirgi Álem chempıony Denıs Kýzın, elimizdiń birneshe dúrkin chempıondary men rekordshylary Ekaterına Aıdova, Roman Krech, Aleksandr Jıgın, Fedor Mezentsev el namysyn qorǵaıdy.
