«Alaý» muz saraıynda dopty hokkeıden Qazaqstan chempıonaty bastaldy
ASTANA. QazAqparat - Astanada «Alaý» muz saraıynda dopty hokkeıden 2000-2001 jylǵy jasóspirimder arasynda Qazaqstan chempıonaty bastaldy. Jarysqa Astana, Oral, Petropavl jáne Hromtaý qalalarynyń quramalary qatysýda, dep habarlaıdy elorda ákimdiginiń resmı saıtynan.
Bul muz saraıy tarıhyndaǵy «rıng-bendı» formatynda ótkizilip jatqan ekinshi dopty hokkeı birinshiligi. Rıng-bendı - bul ataqty oıynnyń shaǵyn nusqasy, munda erejeler ózgertilip, qalypty oıyn alańy orynyna hokkeı kortynda quramalar baq synasady. Oıynnyń dál osy túri álemde úlken suranysqa ıe bolýda.
Qazaqstan quramasy dopty hokkeıden álemdegi eń myqty komandalardyń biri. Sportshylar 2011 jyly 7-shi Azııa oıyndarynda altyn jáne álem birinshilikterinde alty birdeı júldege qol jetkizgen bolatyn.
«Bul óte tartymdy sport túri. Bizde talantty jastar kóp, biraq olardyń ónerin damytýǵa múmkindik az», - dedi Astana quramasynyń bapkeri Valerıı Skýchalın.
Chempıonat osy aptanyń sońyna deıin jalǵasady. Juma kúni, sáýirdiń 17-de uıymdastyrýshylar myqtyny anyqtaıdy. Bul jarysta úzdik atanǵan qurama 2017 jyly ótetin Ýnıversıadada el namysyn qorǵaıtyn bolady.
