«Alaý» muz aıdynynda konkı tebýden Masters sanatyndaǵy ІІ halyqaralyq týrnır ótedi
ASTANA. 1 aqpan. QazAqparat - 2 aqpanda elordadaǵy «Alaý» muz aıdynynda konkı tebý sporty boıynsha Masters International Speed Skating Allround Trophy ekinshi halyqaralyq týrnıri bastalady.
Eske salsaq, Masters sanatyndaǵy saıys óz kareralaryn tamamdaǵan kásibı sportshylar jáne eki jyl boıy resmı jarystarǵa qatyspaı kelgen sportshylar arasynda ótkizilip keledi. Bul týraly «Alaý» muz aıdyny sport kesheniniń baspasóz qyzmetinen habarlandy.
Masters sanaty boıynsha konkı jarysyna Qazaqstan atynan jerlesimiz sprınterli kópsaıystan álemniń absolıýtti chempıony Anjelıka Gavrılova men sprınterli kópsaıystan álem chempıony, 1000 jáne 1500 qashyqtyqtaǵy konkımen júgirýden álem rekordshysy Vladımır Kostın qatysatyn bolady. Sondaı-aq, aıtýly sharaǵa Olımpıada oıyndarynyń úsh dúrkin qatysýshysy Radık Bıkchantaev pen KSRO qarýly kúshteriniń arasyndaǵy chempıony Aleksandr Gavrılov ta ótinish bergen. Budan bólek, týrnırge Qazaqstan konkı tebý federatsııasynyń prezıdenti Vasılıı Krylov pen qurmetti prezıdent Bolat Jamishev qatyspaq.
Budan bólek, atalǵan sharamen qatar «Alaý» kesheninde konkı tebý sportynan Qazaqstan jastar chempıonaty men Qazaqstan kýbogy sarapqa salynatyn bolady.
