Alataýǵa $6,9 mlrd ınvestıtsııa: 55 myń jumys orny ashylýy múmkin
ASTANA. KAZINFORM — «Alatau City Authority» arnaýly basqarý uıymy, Qazaqstan Respýblıkasy Bas prokýratýrasynyń Qoǵamdyq múddelerdi qorǵaý qyzmeti, Investorlardyń quqyqtaryn qorǵaý komıteti jáne Almaty oblysynyń prokýratýrasy ózara túsinistik pen yntymaqtastyq týraly memorandýmǵa qol qoıdy. Bul týraly Bas prokýratýra málim etti.
Qujat ınvestorlardyń quqyǵy men zańdy múddelerin qorǵaý salasyndaǵy ózara is-qımyldy nyǵaıtýǵa, sondaı-aq Alataý qalasynda ınvestıtsııalyq jobalardy iske asyrý úshin qolaıly jaǵdaılar jasaýǵa baǵyttalǵan.
Yntymaqtastyq aıasynda taraptar ınvestorlardyń máselelerine jedel den qoıý tetikterin jetildirýdi, ákimshilik kedergilerdiń aldyn alýdy jáne ınvestıtsııalyq jobalardy iske asyrý barysynda memlekettik organdardyń tıimdi ózara is-qımylyn qamtamasyz etýdi kózdeıdi.
— Bul baǵyttyń mańyzdylyǵy Alatau City-diń ınvestıtsııalyq josparlarynyń aýqymymen aıqyndalady. Qazir qaladaǵy ınvestıtsııalyq pýl 67 jobadan turady. Olardyń jalpy kólemi shamamen 6,9 mlrd AQSh dollaryn quraıdy jáne 55 myńǵa jýyq jumys ornyn qurý áleýeti bar, — delingen habarlamada.
Qazaqstan Respýblıkasy Bas prokýratýrasynyń Investorlardyń quqyqtaryn qorǵaý komıtetiniń tóraǵasy Baýyrjan Eraly ınvestıtsııalyq jospardyń mundaı aýqymynda ınvestorlardyń senimi men olardyń quqyǵyn qorǵaýdyń mańyzy zor ekenin atap ótti.
— Aýqymdy ınvestıtsııalyq kórsetkishterdiń artynda naqty ınvestorlar, olardyń kapıtaly jáne Qazaqstanǵa degen senimi tur. Sondyqtan bizdiń mindetimiz — týyndaǵan máselelerge jaýap berip qana qoımaı, olardy jobalardy iske asyrýdyń bastapqy kezeńderinde aldyn ala boldyrmaý. Búgingi Memorandým Alatau City Authority men prokýratýra organdarynyń múmkindikterin biriktirip, bıznestiń máselelerin jedel sheshýge jáne ınvestorlardy jobalar iske asyrylatyn jerde tikeleı qorǵaýdy kúsheıtýge múmkindik beredi, — dedi Baýyrjan Eraly.
Іs-shara barysynda Komıtet tóraǵasy komıtet jumysynyń negizgi baǵyttary men ınvestorlardyń quqyǵyn qorǵaýdyń qoldanystaǵy tetikterin, onyń ishinde ınvestıtsııalyq jobalardyń tsıfrlyq monıtorıngi, derbes prokýror ınstıtýty, prokýrorlyq súzgi jáne daýlardy sotqa deıin retteý tetikterin tanystyrdy.
Aıta keteıik, búginde Investorlardyń quqyqtaryn qorǵaý komıteti respýblıka boıynsha 3,4 myń ınvestıtsııalyq jobany súıemeldep, ınvestorlardyń quqyǵyn qorǵaýda jáne týyndaıtyn ákimshilik kedergilerdi joıýǵa járdemdesedi.
«Alatau City Authority» arnaýly basqarý uıymynyń bas atqarýshy dırektory Álisher Ábdiqadyrov ınvestıtsııalyq jobalardy belsendi iske asyrý kezeńinde kapıtal tartýmen qatar, ınvestorlardyń odan ári qyzmeti úshin boljamdy jaǵdaılar qalyptastyrýdyń mańyzy zor ekenin atap ótti.
— Qolaıly ınvestıtsııalyq ahýal qalyptastyrý ekonomıkalyq áleýettiń bolýymen ǵana emes, ınvestorlardyń quqyqtaryn qorǵaýdyń naqty ári ashyq tetikteriniń bolýymen de baılanysty. Bizdiń mindetimiz — ınvestıtsııalyq jobalardy júıeli súıemeldeýdi, týyndaıtyn máselelerdi ýaqtyly qaraýdy jáne ákimshilik kedergilerdi azaıtýdy qamtamasyz etý. Qol qoıylǵan Memorandým Alatau City Authority men prokýratýra organdarynyń ózara is-qımylyn kúsheıtip, ınvestorlardyń zańdy quqyqtary men múddelerin qorǵaýdyń qosymsha tetikterin qalyptastyrýǵa múmkindik beredi, — dedi Álisher Ábdiqadyrov.
Memorandýmǵa qol qoıý Alataý qalasynda tıimdi ınvestıtsııalyq ekojúıeni qalyptastyrý jáne ınvestıtsııa tartýǵa, jobalardy súıemeldeýge ári ınvestorlardyń quqyǵyn qorǵaýǵa jaýapty ınstıtýttar arasyndaǵy ózara is-qımyldy nyǵaıtý jolyndaǵy kezekti qadam boldy.
Eske sala keteıik, Alataý Qazaqstandaǵy tolyq tsıfrlanǵan alǵashqy qala bolady.
