Alataýdyń óńirlik jalpy ónimi 50 mlrd dollarǵa jetýi múmkin — Úkimet
ASTANA. KAZINFORM — Alataý qurylǵannan bastap qalanyń áleýetine ınvestorlardyń qyzyǵýshylyǵy joǵary bolyp jatyr. Bul týraly Parlament palatalarynyń birlesken otyrysynda Premer-mınıstrdiń orynbasary Qanat Bozymbaev málim etti.
— Sońǵy 10 jylda álemde ınvestıtsııalar, ınnovatsııalar jáne tehnologııalardy tartý úshin myńnan astam arnaıy ákimshilik jáne ekonomıkalyq aımaq qurý jarııalandy. Bul qalalar nemese aımaqtar arasyndaǵy básekelestik kún saıyn artyp keletinin kórsetedi. Alaıda qurylǵan aımaqtardyń shamamen 60%-y sátsiz aıaqtaldy. Taıaý Shyǵys pen Azııadaǵy jobalardy sátsiz júzege asyrýǵa quqyqtyq jáne salyqtyq derbestiktiń bolmaýy, basqarýdaǵy bıýrokratııa, ınfraqurylymdy damytýǵa qarjynyń jetispeýshiligi, táýelsiz sot júıesiniń álsizdigi, quzyretti organdardyń jarııalanǵan salyq jeńildikterinen qaıta bas tartýy jáne jer ýchaskelerin ınvestorlar múddesine ádiletsiz alyp qoıý máseleleri negiz boldy. Osy sebepterdi nazarǵa almaǵan jaǵdaıda ınvestorlardyń kelmeý qaýpi bar. Sońdyqtan zań jobasyn daıyndaý kezinde osy tájirıbeler men qorytyndylardy tolyq eskerý óte mańyzdy. Óıtkeni Alataý qurylǵannan bastap qalanyń áleýetine ınvestorlardyń qyzyǵýshylyǵy joǵary bolyp jatyr, — dedi Qanat Bozymbaev.
Osy oraıda ol qazirdiń ózinde de jalpy quny 1,8 trln teńge bolatyn alǵashqy 44 ınvestıtsııalyq joba qalyptastyrylyp jáne 30 myńǵa jýyq jańa jumys ornyn ashýǵa múmkindik beretinin aıtty. Bul qalanyń ǵylym, týrızm, medıtsına jáne ınnovatsııalar ortalyǵy retinde damytýdyń negizin qalaıdy. Olardyń qataryna iri álemdik tanymal kompanııalar Mars, PepsiCo, Hyundai Green Food, Envision Energy, Khan Tengri Biopharma jáne eki ındýstrııalyq-logıstıkalyq hab, sondaı-aq ASP Arena, K-Park sııaqty týrıstik jobalar kiredi. Sonymen birge zamanaýı Iconic Complex kópfýnktsıonaldy klasteri, kóshbasshy KAIST Koreıalyq joǵary tehnologııalyq ýnıversıteti jáne pılotsyz ushý apparattar engizý boıynsha strategııalyq jobalary iske asyrylatyn bolady.
— Sonymen qatar, qalany ınfraqurylymmen qamtýdy kezeń-kezeńimen iske asyrý úshin 2030 jylǵa deıingi jospary bekitildi. Alǵa qoıǵan maqsattar iske asqan jaǵdaıda, halyqaralyq sarapshylardyń boljamy boıynsha 2050 jylǵa qaraı qalanyń óńirlik jalpy ónimi 50 mlrd AQSh dollaryna deıin jetedi dep kútilýde, — dedi Úkimet basshysynyń orynbasary.
Buǵan deıin búgin Parlament palatalarynyń birlesken otyrysynda Premer-mınıstrdiń orynbasary Qanat Bozymbaev «Alataý qalasynyń arnaýly mártebesi týraly» Konstıtýtsııalyq zańynyń jobasyn tanystyrǵanyn jazǵan edik.