Alataýdyń bıylǵy bıýdjeti 13 mlrd teńgege jýyq — Qanat Bozymbaev
ASTANA. KAZINFORM — Onyń 60%-dan astamy jergilikti bıýdjetke tıesili. Bul jóninde QR Premer-mınıstriniń orynbasary Qanat Bozymbaev Memleket basshysynyń Alatau City jobasyna qatysty tapsyrmalaryn iske asyrý jónindegi baspasóz konferentsııasynda málimdedi.
— Alataýdyń 2026 jylǵa bıýdjeti — 12,9 mlrd teńge. Onyń 7,8 mlrd teńgesi qalanyń óz qarajatynan alynǵan. 3,5 mlrd teńge oblys bıýdjetinen transfert jasaldy. Qalǵan 1,5 mlrd teńge jyl basynda artylǵan qarjydan alyndy. Qazirgi jumystar úshin bul shaǵyn ǵana bıýdjet, — dedi ol.
Vıtse-premerdiń aıtýynsha, Alataýdyń arnaýly quqyqtyq mártebesi týraly konstıtýtsııalyq zań kúshine engen soń, qalada eki bólek bıýdjet iske qosylady.
Ákimdiktiń quziretindegi jergilikti bıýdjetti máslıhat bekitedi. Ol áleýmettik jáne basqa da shyǵyndarǵa jumsalady.
Sonymen qatar, jeke «damý bıýdjeti» bolady. Ony jańa memlekettik organ Alatau City Authority basqaryp, atalǵan mekeme ınfraqurylym salýmen jáne shahardy órkendetýmen aınalysady. Bul bıýdjetti Premer-mınıstr tóraǵalyq etetin Alataýdy damytý boıynsha keńes bekitip otyrady.
— Qala ózin-ózi qamtamasyz etetin deńgeıge jetkenshe, onyń bıýdjetindegi qarjyny basqa óńirlerdiń ne qalalardyń bıýdjetine alýǵa tyıym salyndy. Alataýda jınalǵan salyqtyń barlyǵy shahardyń órkendeýine jumsalady, — dedi Qanat Bozymbaev.
Aıta keteıik, buǵan deıin Alataý qalasyna arnaýly quqyqtyq mártebe berilgenin jazǵanbyz.
