Alataýdyń arnaýly quqyqtyq mártebesi: konstıtýtsııalyq zańda sátti jáne sátsiz tájirıbeler eskerildi
ASTANA. KAZINFORM — Qalanyń strategııalyq damý josparyn daıyndaý barysynda Qytaı, BAÁ, Sıngapýr tárizdi elderdiń tájirıbesi zertteldi. Bul jóninde QR Premer-mınıstriniń orynbasary Qanat Bozymbaev Memleket basshysynyń Alatau City jobasyna qatysty tapsyrmalaryn iske asyrý jónindegi baspasóz konferentsııasynda málimdedi.
— Sońǵy on jylda álemde myńnan astam arnaıy ákimshilik jáne ekonomıkalyq aımaq quryldy. Onda ınvestıtsııalar, ınnovatsııalar jáne tehnologııalar tartý kózdeldi. Demek, bul salada báseke óte joǵary. Atalǵan jobalardyń 60%-y sátsiz boldy, — dedi ol.
Vıtse-premerdiń sózinshe, Taıaý Shyǵys pen Azııada keı jospardyń iske aspaýyna quqyq jáne salyq sektorynda derbes sheshim qabyldaý múmkindiginiń bolmaýy, shekten tys bıýrokratııa, ınfraqurylymdyq qarjylandyrýdyń jetispeýi jáne táýelsiz sot júıesiniń álsizdigi áser etken.
Qanat Bozymbaev osynyń barlyǵy Alataýdyń arnaýly quqyqtyq mártebesi týraly konstıtýtsııalyq zańdy daıyndaý barysynda eskerilgenin atap ótti.
Ásirese, Qytaıdyń Shenchjen jáne Haınan qalalarynyń tájirıbesine aıryqsha nazar aýdaryldy. Atalǵan shaharlardyń ákimshiligine salyq júıesi, jeńildik jáne ınvestıtsııalyq qoldaý boıynsha keń quziret berilgen.
— 2026 jyldan bastap Haınannyń jańa saýda jáne ınvestıtsııalyq hab retinde orny nyǵaıdy. Osy tájirıbeni eskerip, Alataý qalasynyń keńesine arnaıy salyq rejımin jáne ınvestıtsııalyq qoldaý sharalaryn bekitý boıynsha quziret berildi. Bul, ásirese, ınnovatsııalyq salalardy damytý úshin mańyzdy. «Tómen bıiktik ekonomıkasy» baǵyty aıasynda 3 myń metrge deıingi áýe keńistigin paıdalaný qarastyrylyp jatyr, — dedi vıtse-mınıstr.
Odan bólek, Dýbaıdaǵy arnaıy ekonomıkalyq aımaqtar mysalyna da mán berildi. Sol sebepti, Alataýda memlekettik qyzmet kórsetý jáne bıznes lıtsenzııalaryn berý boıynsha «bir tereze» mehanızmi engizilmek.
Al uzaqmerzimdi josparlaý máselesinde bılik Sıngapýr tájirıbesine júginbek. Strategııalyq qujattar uzaq merzimge qabyldanyp, olarǵa 5-10 jyl eshqandaı ózgeris engizilmeıdi.
Aıta keteıik, buǵan deıin Alataýdyń bıylǵy bıýdjeti 13 mlrd teńgege jýyqtaıtynyn jazǵanbyz.
