Alataýdan Almatyǵa aerotaksımen 15 mınýtta jetýge bolady — Bozymbaev
ASTANA. KAZINFORM — Premer-mınıstr orynbasary Qanat Bozymbaev «tómen bıiktikter ekonomıkasy» týraly aıtty jáne onyń jańa Alataý qalasynda qalaı engiziletinin túsindirdi.
Q.Bozymbaevtyń aıtýynsha, jańa Alataý qalasyn damytýdyń negizgi baǵyttarynyń biri — shaǵyn avıatsııany damytý bolmaq.
— Alataý qalasy Qytaıdan tys jerde alǵash ret, mysaly, aerotaksı nemese drondardy 120 metrden joǵary bıiktikte uzaq qashyqtyqqa synaqtan ótkizýge múmkindik beretin orynǵa aınalady. Qazirgi tańda mundaı tájirıbe tek Qytaıda, Shenchjen qalasynda júzege asyrylǵan. Ony bıyldyń ózinde bastaımyz dep úmittenemiz. AQSh-taǵy osy saladaǵy jetekshi kompanııalardyń biri — Joby Aero kompanııasymen kelissózder júrgizip, birqatar qujattarǵa qol qoıdyq. Olardyń aerotaksılerine 15 jylǵa kezek bar. Sondaı-aq qytaılyq AutoFlight kompanııasymen de jumys istep jatyrmyz, — dedi Q. Bozymbaev birlesken otyrys barysynda.
Spıker elde kvadroporttar salý da josparlanyp otyrǵanyn atap ótti. Olar Alataý, Qonaev qalalaryn, Almatynyń birqatar núktelerin jáne týrıstik baǵyttardy baılanystyrady.
— Bul baǵyt boıynsha jylyna shamamen 8 mıllıon týrısti qamtý múmkindigin baǵalap otyrmyz. Bul úlken aınalym, sondyqtan osy áleýetti paıdalanýymyz qajet. Endi elestetip kórińizder, bul aerotaksıler saǵatyna shamamen 300-350 shaqyrym jyldamdyqpen ushady. Almaty oblysy, Alataý jáne Almaty arasyndaǵy osy úsh baǵyt boıynsha alǵashqy kezeńde, aldaǵy eki-úsh jylda, arnaıy bólingen baǵyttarmen áýe arqyly 10-15 mınýtta jetýge bolady. Bul – ushqyshsyz avıatsııa, — dep tolyqtyrdy ol.
Aıta keteıik, elordada Parlament palatalarynyń birlesken otyrysy ótti. Jıynda Májilis pen Senat depýtattary «Alataý qalasynyń arnaýly mártebesi týraly» Qazaqstan Respýblıkasy Konstıtýtsııalyq zańynyń jobasyn birinshi oqylymda maquldandy.
Alataý qalasyndaǵy negizgi strategııalyq sheshimderdi Premer‑mınıstr basqaratyn Keńes aıqyndaıdy. Investorlardyń quqyqtary halyqaralyq deńgeıde qorǵalady. Al salyq jeńildikteri tek basym salalardaǵy jańa ınvestıtsııalyq jobalarǵa beriledi.
