Alataýdaǵy jańa emhana ǵımaraty halyqqa qyzmet kórsetýge daıyn - bas dáriger Gúlnar Qasymova
ALMATY. 22 maýsym. QazAqparat - Almaty qalasynda jańadan iske qosylǵan Medeý aýdanyndaǵy Alataý kentindegi jańa emhana ǵımaraty Astana kúni paıdalanýǵa beriledi.
Ony emhananyń bas dárigeri Gúlnar Qasymova búgin qala ákimi Ahmetjan Esimov emhana jumysymen tanysýǵa kelgen kezde aıtty.
Alataý eldi mekenindegi eski emhananyń janynan boı kótergen jańa nysannyń 1-qabatynda balalar bólimi, tirkeý orny, ashana jáne flıýorografııa, rentgen kabınetteri bar. Al 2-qabatynda kúndizgi statsıonar bólimi ornalasqan. «Alataý qalalyq emhanasynyń» bas dárigeri Gúlnar Qasymovanyń aıtýynsha, qazirgi zamanǵy ja ńa qural-jabdyqtarmen jabdyqtalatyn bul emhana jobasyna 524 mln teńge jumsaldy. Eńseli jáne dálizderi keń, bólmeleri jaryq, kishkentaı balalar men múgedekterge arnalǵan arnaıy pandýstary men 2 lıftisi bar bul emhananyń kólemi 4800 sharshy metrdi quraıdy.
«Onda Alataý eldi mekeniniń keńeıýine baılanysty 15 sala boıynsha qyzmet kórsetiledi. Buryn em alý úshin qalaǵa qatynap kelgen turǵyndar endi qajetti qyzmet túrlerin bizdiń emhanada paıdalana alady. Fızıoterapııalyq, dene shynyqtyrý, massaj bólimsheleri bizdiń basty maqtanyshymyz», - deıdi medıtsına salasynda 30 jyldyq tájirıbesi bar G.Qasymqyzy. Bas dárigerdiń sózine qaraǵanda, qarapaıym jurt kóbine-kóp dári-dármekpen emdeý tıimdi dep sanaıdy. Fızıoterapııa, medıkamentter jáne massajdy biriktirgen jaǵdaıda ǵana ol dertke shıpa, janǵa daýa bolatynyn eskermeıdi. Sondyqtan bolashaqta salaýatty ómir salty, dıabet mektebi, kardıo mektebi sııaqty qosymsha kabınetter ashý josparlanýda. Sebebi Alataýda negizinen ıadrolyq fızıka ınstıtýtynyń irgetasyn qalaǵan, jastary 50-den asqan adamdar turady. Olardyń kóbi júrek aýrýlaryna shaldyqqandar. Buryn eń jaqyn mańdaǵy kardıoortalyqqa barý úshin keminde turǵyndar 40 mınýt ýaqyt jumsaıtyn. Endi ony 4-5 esege deıin qysqartýǵa qol jetkizilip otyr.
