Alataýdaǵy úzdik jobalar eldiń basqa óńirlerine engizilmek — Bozymbaev

ASTANA. KAZINFORM — Alataýdaǵy úzdik jobalar eldiń basqa qalalaryna taratylady. Bul týraly Premer-mınıstrdiń orynbasary Qanat Bozymbaev málim etti. 

Onyń aıtýynsha, Alataýdaǵy negizgi jobalar eksperımenttik alań retinde qarastyrylyp otyr. Onda qurylys salasynda jáne nysandardy paıdalanýda halyqaralyq standarttardy engizý josparlanǵan.

— Alataýdy damytý úshin birneshe jyl qajet dep oılaımyz. Keıbir erekshe ǵımarattardy salý jáne paıdalaný kezinde halyqaralyq standarttardy engizemiz. Bul tájirıbeni Alataýdaǵy aýmaqtarda eksperımenttik túrde synaqtan ótkizýimiz kerek. Sondyqtan tıimdi tásilderdi mindetti túrde eldiń basqa óńirlerinde engizýge bolady, — dedi Qanat Bozymbaev Parlament palatalarynyń birlesken otyrysynan keıin tilshiler suraǵyna jaýap bere otyryp.

Premer-mınıstrdiń orynbasary alǵashqy nátıjeni 2-3 jyldan keıin kórýge bolatynyn atap ótti.

— 2-3 jyldan keıin belgili bir nátıje bolady dep oılaımyn, ıaǵnı ońtaıly tustary kórine bastaıdy. Atap aıtqanda, osy nátıjeni eskere otyryp, elimizdegi kóptegen salany reformalaı alamyz, — dedi Úkimet basshysynyń orynbasary.

Budan buryn habarlanǵandaı, búgin elordada Parlament palatalarynyń birlesken otyrysy ótip, «Alataý qalasynyń arnaýly mártebesi týraly» Qazaqstan Respýblıkasy Konstıtýtsııalyq zańynyń jobasy qaraldy.

Talqylaýdan keıin depýtattar bul qujatty birinshi oqylymda maquldady.