Alataýdaǵy qoqys polıgonyndaǵy órtke baılanysty tótenshe jaǵdaı jarııalanýy múmkin

ALATAÝ. KAZINFORM – Alataý qalasynda qoqys polıgonyndaǵy órt saldarynan jergilikti aýqymdaǵy tehnogendik sıpattaǵy tótenshe jaǵdaı jarııalaý máselesi qaralýda. Bul týraly qala ákimdiginiń baspasóz qyzmeti málim etti.

Ákimdik «Jergilikti aýqymdaǵy tehnogendik sıpattaǵy tótenshe jaǵdaı jarııalaý týraly» sheshim jobasyn qoǵamdyq talqylaýǵa shyǵardy. Qujatty qala ákimi apparaty daıyndaǵan.

Tótenshe jaǵdaı «Azamattyq qorǵaý týraly» zańǵa jáne TJ-nyń jiktelýine sáıkes engiziledi. Qujattyń túsindirme jazbasynda sheshim qabyldaý halyqty der kezinde habardar etýge jáne qajetti sharalardy uıymdastyrýǵa baǵyttalǵany kórsetilgen.

Joba 2025 jylǵy 17 qyrkúıekke deıin «Ashyq NQA» portalynda qoǵamdyq talqylaýda bolady.

Eske salaıyq, 15 qyrkúıek kúni Almaty mańyndaǵy qoqys polıgonynda órt shyqqany habarlanǵan edi.

Órt 35 gektar aýmaqtyń shamamen 10 gektaryn sharpyǵan. Polıgon «ADC TAZA ALEM» JShS-ne tıesili. Órtti sóndirý barysynda sý Terenqara ózeninen alynyp jatyr.

Qyzmetkerlerdiń aıtýynsha, órtti sóndirý qıyndyq týǵyzýda, sebebi órt aýqymy joǵary.

Oqıǵa Almaty – Óskemen avtojolynyń 35-shaqyrymynda, Alataý aýyly mańyndaǵy turmystyq qatty qaldyqtar polıgonynda bolǵan.