Alataýda alǵashqy 5G bazalyq stantsııasy iske qosyldy
ALMATY. KAZINFORM – Jasandy ıntellekt jáne tsıfrlyq damý mınıstrliginiń Telekommýnıkatsııalar komıteti jumys sapary barysynda baılanys sapasyn jaqsartý jáne telekommýnıkatsııa qyzmetteriniń qoljetimdiligin arttyrý máselelerin qarastyrdy.
Komıtet ókilderi Alataý qalasy ákimdigi jáne baılanys operatorlarymen birlesip «Zarechnyı» jáne «Jetigen» shaǵyn aýdandarynda, sondaı-aq «Almaty–Qonaev» avtojolyna bardy. Negizgi nazar turaqty sıgnaldy qamtamasyz etýge jáne qala mańy men shalǵaı aýmaqtarda baılanys qoljetimdiligin arttyrýǵa baǵyttaldy.
Іs-shara aıasynda «Mobaıl Telekom-Servıs» kompanııasynyń besinshi býyn (5G) jelisiniń alǵashqy bazalyq stantsııasy iske qosyldy. Jańa stantsııa jeliniń ótkizý qabiletin arttyryp, paıdalanýshylarǵa joǵary jyldamdyqty ınternetke qol jetkizýge múmkindik beredi.
Sapar qorytyndysy boıynsha Alataý qalasy ákimdiginde telekommýnıkatsııa ınfraqurylymyn damytý máseleleri talqylanǵan keńes ótti. Kezdesýde besinshi býyn (5G) jelilerin odan ári engizý, memlekettik mekemeler men turǵyn úı massıvterin joǵary sapaly baılanyspen qamtamasyz etý jáne óńirdegi baılanys sapasyn arttyrý baǵytyndaǵy josparlar qaraldy.
Erekshe nazar bilim berý uıymdaryn ınternetke qosýǵa aýdaryldy: jyl sońyna deıin Alataý qalasyndaǵy barlyq mektepter joǵary jyldamdyqty ınternetpen qamtamasyz etiledi.
Jıyn qorytyndysy boıynsha 2025–2027 jyldarǵa arnalǵan Alataý qalasyn sapaly mobıldi baılanys jáne ınternetpen qamtamasyz etý jónindegi jol kartasyna qol qoıyldy. Qujatta baılanys jelilerin kezeń-kezeńimen jańǵyrtý, jańa ınfraqurylym salý, sondaı-aq áleýmettik jáne bilim berý nysandaryn joǵary jyldamdyqty ınternetke qosý sharalary kózdelgen.