Alataýda 1 mln adam turýy múmkin: elektr jelileri aldyn ala salynady
QONAEV. KAZINFORM — Alataý qalasynda halyq sany kóp bolatynyn eskere otyryp, zamanaýı energetıkalyq jáne ınjenerlik ınfraqurylym qurý josparlanyp otyr.
Alatau City Authority jobalaý jáne qurylys normalary departamentiniń dırektory Tımýr Tashmuhambetovtyń jobalaýynsha, 2040 jylǵa qaraı turǵyndar sany shamamen 1 mıllıon adamǵa jetýi múmkin. Ol muny Powerexpo Almaty 2026 kórmesi aıasynda ótken «Almaty energetıkasy: damýdyń 105 jyly jáne jańa ósý núkteleri» atty plenarlyq sessııada málimdedi.
Onyń aıtýynsha, qalany damytýǵa jaýapty uıym Alataýdyń aldaǵy 5, 15 jáne 30 jyldaǵy damý baǵyttaryn aıqyndaıtyn bas jospar ázirleýge kirisken. Bul jumysqa bas josparlaý jáne taldaý salasyndaǵy halyqaralyq sarapshylar — Ulybrıtanııanyń Arup kompanııasy men Sıngapýrdyń BCG kompanııasy tartylǵan.
Ol mamandar qalanyń damý josparyn ázirlep, ozyq damý ortalyǵy retindegi mártebesin qamtamasyz etý úshin qajetti ınfraqurylymdyq qýattardy aldyn ala eseptep jatqanyn atap ótti.
— Qalanyń avtonomııasy týraly konstıtýtsııalyq zań qabyldanýy damýymyzǵa úlken múmkindik beredi. Sonymen qatar qalanyń aldaǵy damý baǵyty úshin úlken jaýapkershilik júkteıdi. Bizdiń strategııalyq artyqshylyǵymyz — ınjenerlik jáne elektr ınfraqurylymyn qalyptasyp qoıǵan qurylysqa beıimdeýge tyryspaı, ony aldyn ala josparlap, salýymyzda. Bul rette qazir ázirlenip jatqan jospardy basshylyqqa alamyz, — dedi Tashmuhambetov.
Onyń sózinshe, qajetti energetıkalyq qýat kólemi birneshe damý stsenarııi negizinde eseptelip jatyr.
— Biz birneshe stsenarıı ázirledik. Qazir jumys istep jatqanymyz — qalany damytýdyń optımıstik stsenarııi. Oǵan sáıkes, 2040 jylǵa qaraı qalaǵa shamamen 1 mıllıon adam kelýi tıis, — dep atap ótti Tımýr Tashmuhambetov.
Osy boljam negizinde elektr energııasyn óndirý men taratý júıelerin, elektr jáne jylý jelilerin, sýmen jabdyqtaý, sý daıyndaý jáne tazartý nysandaryn biriktiretin zamanaýı ınfraqurylymdyq habtar qurý josparlanyp otyr.
— Qalany damytý kezinde energııa óndirý kózderin ártaraptandyrýǵa jáne ozyq elektr ınfraqurylymyn qurýǵa da basymdyq beremiz. Maqsatymyz — qalany josparlaý kezeńinen bastap ondaǵan jyl boıy senimdi ári turaqty energııamen jabdyqtaýdy qamtamasyz etý, — dedi Tashmuhambetov.
Infraqurylymnyń tehnıkalyq sheshimderin ázirleý jáne jobalaý úshin Ońtústik Koreıa, Qytaı, AQSh pen Ulybrıtanııanyń halyqaralyq seriktesteri tartylyp jatyr.
Tımýr Tashmuhambetovtiń aıtýynsha, komanda quramynda munaı, taý-ken jáne ınfraqurylym salalaryndaǵy halyqaralyq jobalarda tájirıbe jınaǵan qazaqstandyq mamandar da bar.
— Qazir jergilikti qamtýǵa basymdyq berý máselesi pysyqtalyp jatyr. Satyp alý jónindegi jeke normatıvtik akt ázirlenip jatyr. Onda múmkindiginshe jergilikti óndiristi qoldaýǵa basymdyq beremiz. Áńgime Alataý qalasynyń qajettilikterine saı jumys isteıtin jáne qalada tikeleı ashylatyn kásiporyndar týraly bolyp otyr, — dedi ol.
Eske salaıyq, 21–22 qazanda Almatyda Powerexpo Almaty 2026 halyqaralyq energetıkalyq kórmesi ótip jatyr.
Buǵan deıin Alataý qalasynda qandaı ınfraqurylymdyq jobalar iske asyrylyp jatqany habarlandy.
