«Alataý» teatrynyń 10 jyldyǵyna oraı 11 spektakl kórermenge usynylady
ALMATY. KAZINFORM — Almatyda «Alataý» dástúrli óner teatrynyń 10 jyldyǵyna arnalǵan respýblıkalyq teatr festıvali ótedi.
2026 jyly 15-20 qarasha aralyǵynda Almaty qalasy ákimdiginiń qoldaýymen «Alataý» dástúrli óner teatrynyń 10 jyldyq mereıtoıyna arnalǵan ALMATY THEATRE FESTIVAL respýblıkalyq teatr festıvali ótedi.
Festıvaldiń saltanatty ashylýy 15 qarashada ótedi.
15:00 — baspasóz konferentsııasy
16:00 — festıvaldiń resmı ashylý saltanaty
17:00 — festıval baǵdarlamasy rejısser Farhad Moldaǵalıdyń soundrama janryndaǵy «Mámlúk» qoıylymymen bastalady.
Festıvalge Qazaqstannyń ár óńirinen kelgen teatr ujymdary qatysyp, kórermen nazaryna túrli janrdaǵy tańdaýly spektaklderin usynady. Qatysýshylar qatarynda Jezqazǵan, Astana, Taldyqorǵan, Qyzylorda, Qaraǵandy qalalary men Batys Qazaqstan oblysynyń teatrlary, sondaı-aq Almatynyń shyǵarmashylyq ujymdary bar.
Festıval baǵdarlamasyna «Mámlúk», «Voıtsek», «Sáıgúlik», «She Is Aiel», «Jabaıy alma», «Naızaǵaı», «Qorǵansyz», «Tomırıs», «Orteke», «Romeo men Djýletta» jáne «Gúlge umtylǵan ekeý» spektaklderi endi.
Sonymen qatar festıval aıasynda «Dástúrli óner jáne zamanaýı teatr keńistigi» taqyrybynda respýblıkalyq ǵylymı-tájirıbelik konferentsııa ótedi. Konferentsııa qatysýshylary ulttyq teatr ónerin damytý baǵyttaryn, sondaı-aq qazirgi teatr úderisiniń ózekti máselelerin talqylaıdy.
Festıvaldiń ótetin kúnderi: 15-20 qarasha, 2026 jyl.
Ótetin orny: «Alataý» dástúrli óner teatry (Nurkent shaǵynaýdany, 6).
Baılanys telefony: +7 (777-67) 8-85-94