Alataý polıgonyndaǵy órtten keıin qalada jańa normalar bekitiledi
ALATAÝ. KAZINFORM — Alataý qalasynda turmystyq qatty qaldyqtardy jınaýǵa, tasymaldaýǵa, suryptaýǵa jáne kómýge arnalǵan jańa tarıfter bekitilmek.
Tıisti joba «Ashyq NQA» portalynda talqylaýǵa shyǵaryldy. Ony Alataý qalasynyń turǵyn úı-kommýnaldyq sharýashylyq jáne turǵyn úı ınspektsııasy bólimi ázirlegen.
Joba sheshimimen kommýnaldyq qaldyqtardyń túzilýi men jınalý normalaryn, sondaı-aq qatty turmystyq qaldyqtardy jınaý, shyǵarý jáne kómýge arnalǵan tarıfterdi bekitý kózdeledi. Negizgi mindetteri:
— qaldyqtardy shyǵarý jáne kádege jaratý jónindegi uıymdardyń qyzmetin qarjylandyrýdyń ekonomıkalyq turǵydan negizdelgen tetigin qurý;
— eldi mekenderdiń sanıtarlyq jaǵdaıyn saqtaý jáne ruqsat etilmegen qoqys oryndarynyń paıda bolýynyń aldyn alý;
— ekologııalyq qaýipsizdikti arttyrý jáne qaldyqtardyń qorshaǵan ortaǵa teris áserin azaıtý.
Joba 2025 jyldyń 6 qarashasyna deıin talqylaýda bolady.
Eske salaıyq, Alataý qalasynyń qatty turmystyq qaldyqtar polıgonynda bir aptaǵa jýyq órt boldy.
Іri órtke baılanysty Alataýda jergilikti aýqymdaǵy tehnogendik sıpattaǵy tótenshe jaǵdaı rejımi engizildi.
Keıin bul polıgon jabylýy múmkin ekeni habarlandy.