Alataý polıgonyndaǵy órtti sóndirýge 5 oblys pen 2 qalanyń TJD kúshteri tartyldy

ALATAÝ. KAZINFORM — Órtti sóndirý jumystary qıyndap tur. Sebebi órt kóp aýmaqty sharpyǵan, jerdiń 10 metr tereńdiginde áli de byqsyǵan shoqtar bar, al jeldiń baǵytynyń ózgerýi jalyndy qaıta kúsheıtip jiberedi, dep habarlaıdy TJM baspasóz qyzmeti.

Tótenshe jaǵdaılar mınıstri, general-maıor Shyńǵys Árinovtiń tapsyrmasy boıynsha keshe keshke órt ornyna Órtke qarsy qyzmet komıtetiniń tóraǵasy Erlan Tóregeldıev bardy.

Іs-qımyldardy úılestirý oqıǵa ornynda da, TJM Komandalyq ortalyǵynan da júrgizilip jatyr.

Polıgonda órtti sóndirý jumystaryn táýlik boıy júzege asyratyn jedel shtab jumysqa kirisken. Órtti sóndirýdiń 6 ýchaskesi quryldy.

Órt ornynda «Tereń-Qara» ózeninen ashyq sý kózine avtomobıl-sorǵy jeńin ornatý arqyly magıstraldyq jeli tartylyp, sýdy úzdiksiz jetkizý uıymdastyryldy. Bul jumystarǵa 6 tehnıka: bir avtomobıl-sorǵy jeńi jáne 5 avtotsısterna jumyldyryldy. Órtti sóndirýge 11 órt oqpany jáne 1 tasymaldy lafetti oqpan berildi.

— Órtti sóndirý jumystary órt júktemesimen, 10 metr tereńdiktegi byqsýmen jáne jel baǵytynyń ózgerýimen kúrdelenip otyr. Órtti sóndirýge Almaty, Shymkent qalalary, Qaraǵandy, Túrkistan, Jambyl, Jetisý jáne Abaı oblystarynyń TJD kúshteri men quraldary, sondaı-aq QR TJM Martbek Mamraev atyndaǵy 52859 jáne Qasym Qaısenov atyndaǵy 68303 áskerı bólimderiniń áskerı qyzmetshileri qosymsha jumyldyryldy. Barlyǵy 200-den astam jeke quram men 90-nan astam tehnıka jumys istep jatyr, — delingen habarlamada.

Kúndiz-túni qutqarýshylar oshaqtardy ınertti materıaldarmen toltyryp, topyraqty tyǵyzdaý jumystaryn júrgizedi. Bul ádis ottyń byqsýyn otteginiń qoljetimdiligin tolyǵymen jaýyp, órttiń túpkilikti joıylýyn qamtamasyz etýge múmkindik beredi. 

Budan buryn Alataýdaǵy qoqys polıgonyndaǵy órtke baılanysty tótenshe jaǵdaı jarııalanýy múmkin ekeni aıtylǵan edi.