Alataý polıgonyndaǵy órt: oblysta aýa sapasy sanıtarlyq normaǵa sáıkes pe

ALMATY. KAZINFORM – Almaty oblysynda aýa sapasyna júrgizilgen zertteýlerdiń qorytyndysy jarııalandy.

Almaty oblysy ákimdiginiń málimetinshe, 16–17 qyrkúıek kúnderi Іle aýdandyq sanıtarııalyq-epıdemıologııalyq baqylaý basqarmasynyń mamandary «Ulttyq saraptama ortalyǵynyń» zerthanasymen birlesip, «ADK Taza Álem» JShS qatty turmystyq qaldyqtar polıgony mańyndaǵy selıtebtik aımaqta atmosferalyq aýany ólsheý jumystaryn júrgizdi.

Monıtorıng birneshe jerde júzege asyrylǵan. Olar: Ótegen batyr men Baıserke aýyldarynyń arasyndaǵy shekarada, Zamanbek Battalhanov pen Seıfýllın kósheleriniń qıylysynda, sondaı-aq PKST «Dachnık» jáne «Prostor» saıajaı massıvterinde. Zertteý barysynda segiz kórsetkish boıynsha synama alynǵan. Olardyń ishinde azot totyǵy, kúkirt dıoksıdi, benzol jáne ammıak deńgeıleri tekserildi.

- Ólsheý nátıjeleri boıynsha zııandy zattardyń shekti ruqsat etilgen kontsentratsııalary tirkelgen joq. Barlyq kórsetkishter Qazaqstan Respýblıkasy Densaýlyq saqtaý mınıstrliginiń gıgıenalyq normatıvterine tolyq sáıkes ekeni anyqtaldy. Mamandardyń aıtýynsha, turǵyn aımaqtardaǵy aýa sapasy belgilengen normalar sheginde saqtalǵan, - dep habarlady ákimdikten.

Eske salaıyq, buǵan deıin Alataý polıgonyndaǵy órtti sóndirýge 5 oblys pen 2 qalanyń TJD kúshteri tartylǵanyn jazǵanbyz.