Alataý men Qonaevta uıaly baılanyssyz qalǵan aýmaqtar anyqtaldy
ASTANA. KAZINFORM — Alataý men Qonaev qalalarynda uıaly baılanystyń «aq daqtary» tekserildi, dep habarlaıdy QR Jasandy ıntellekt jáne tsıfrlyq damý mınıstrliginiń baspasóz qyzmeti.
QR Jasandy ıntellekt jáne tsıfrlyq damý mınıstrliginiń Telekommýnıkatsııalar komıteti baılanys operatorlarymen birlesip, Almaty oblysynyń Alataý jáne Qonaev qalalarynda uıaly ınternet joq aımaqtarǵa kóshpeli monıtorıng júrgizdi.
Mınıstrlik túsindirip ótkendeı, «aq daqtar» — baılanys operatorlary tarapynan ınternetke qoljetimdilik tolyqtaı joq aýmaqtar.
Vedomstvo málimetinshe, Alataý qalasynda 28 «aq daq» anyqtaldy.
— Olardy joıý jumystaryn bıylǵy jyldyń sońyna deıin aıaqtaý josparlanyp otyr. Qosymsha 5 bazalyq stantsııa ornatý kózdelgen, bul qamtý aýmaǵyn, sonyń ishinde avtomobıl joldarynyń boıyn keńeıtýge múmkindik beredi. Qazir jabdyqtardy ornalastyrý úshin antenna-machtalyq qurylǵy ornatylǵan. Bazalyq stantsııalar qoıylǵannan keıin bul buryn baılanys bolmaǵan ýchaskelerdi ınternetpen qamtamasyz etýge múmkindik beredi, — deıdi mamandar.
Sondaı-aq Qonaev qalasynda 9 «aq daq» anyqtalǵan. «Kar-Tel» kompanııasy taıaýdaǵy bir aı ishinde anyqtalǵan aımaqtardyń keminde 7-ýindegi máseleni joıýdy josparlap otyr.
Halyqty sapaly uıaly baılanyspen qamtamasyz etý jumystary operatorlardyń lıtsenzııalyq mindettemeleri sheńberinde de júrgizilip jatyr. Osy mindettemelerge sáıkes, halqy 250 adamnan asatyn barlyq 3 807 aýyldyq eldi meken uıaly baılanyspen qamtylady.
Atap aıtsaq, Shengeldi aýyly 2025 jyly uıaly baılanyspen qamtamasyz etilýi tıis bolatyn. Operatorlar baılanys sapasyn arttyrýǵa jáne zamanaýı tehnologııalarǵa ótýge baǵyttalǵan bazalyq stantsııalardy jańǵyrtty. Aýylǵa jasalǵan sapar barysynda 4G jáne 5G tehnologııalary boıynsha ınternet-qosylystyń joǵary sapasy tirkeldi.
Shengeldidegi 5G jelisi «Mobaıl Telekom-Servıs» JShS operatorynyń bastamasymen ornatyldy.
Búgingi tańda baılanys operatorlary qalalarda 5G jelisin óristetý boıynsha eń tómengi lıtsenzııalyq mindettemelerdi oryndap, aýyldyq eldi mekenderde besinshi býyn jelisin keńeıtýge kiristi.
— Sonymen qatar, baılanys joq aımaqtardy anyqtaý jáne joıý jumystary turaqty túrde júrgizilip keledi. «Aq daqtarǵa» qatysty jaǵdaı dınamıkalyq sıpatqa ıe: aýmaqtarda qurylys júrip, jańa turǵyn úı alqaptarynyń paıda bolýyna baılanysty baılanysy joq jańa ýchaskeler paıda bolýy múmkin. Osyǵan baılanysty «aq daqtarǵa» monıtorıng turaqty negizde júrgiziledi, — dep túsindirdi mınıstrlik.
Osyǵan deıin Astanada ınternet máselesin jaryq baǵanalary arqyly sheship jatqanyn jatqanyn jazǵan edik.
