Alataý mektebinde qozǵalysty jáne jabdyqtardyń jaı-kúıin baqylaıtyn júıe synaqtan ótip jatyr
ASTANA. KAZINFORM — Alataý qalasyndaǵy keń jolaqty ınternetke qoljetimdilik deńgeıi baǵalanady. Bul týraly Quryltaı depýtattarynyń saýalyna Premer-mınıstrdiń orynbasary Qanat Bozymbaevtyń jaýabynda aıtylǵan.
Vıtse-premerdiń sózine qaraǵanda, Alataýdyń tsıfrlyq modeli qala aýmaǵyndaǵy barlyq eldi mekendi qosa alǵanda, búkil ákimshilik aýmaqty qamtıdy. Qalalyq tsıfrlyq servıster elektrondyq úkimettiń ulttyq ınfraqurylymymen ıntegratsııalana otyryp, teń qoljetimdilik, biryńǵaı kirý núktesi, tsıfrlyq ınklıýzııa jáne kezeń-kezeńimen engizý qaǵıdattary negizinde damytylady.
— Tsıfrlyq qyzmetterdiń qoljetimdiligi men sapasyn qamtamasyz etý úshin antenna-dińgekti qurylystar men talshyqty-optıkalyq baılanys jelilerin salýdy qosa alǵanda, mobıldi jáne tirkelgen telekommýnıkatsııalyq ınfraqurylymdy damytý kózdeledi. Bul rette qalanyń barlyq eldi mekeninde, onyń ishinde birinshi kezekte áleýmettik obektilerde baılanyspen qamtý jáne keń jolaqty ınternetke qoljetimdilik deńgeıine baǵalaý júrgiziletin bolady, — dedi ol.
Onyń atap ótýinshe, qurylys salý, ınjenerlik jeliler, áleýmettik obektiler men abattandyrý týraly derekterdiń biryńǵaı modeli retinde qalanyń tsıfrlyq egizin qalyptastyrý, sondaı-aq qalalyq ınfraqurylymdy jalpy basqarý júıesine qosý úshin IoT jáne ınteroperabeldiliktiń (ártúrli aqparattyq júıelerdiń, baǵdarlamalar men qurylǵylardyń ózara úılesimdi jumys istep, bir-birimen derek almasý múmkindigi) biryńǵaı standarttaryn engizý josparlanǵan.
— «№ 20 orta mektep» KMM-de Pixel Networks kompanııasymen birlesip, mıkroklımatty, energııa tutynýdy, adamdardyń bolýyn jáne jabdyqtyń jaı-kúıin monıtorıngteýdi qamtamasyz etetin datchıkterdiń kórsetkishterin keshendi taldaýǵa arnalǵan pılottyq joba tehnıkalyq turǵydan iske qosyldy. Pılottyq jobanyń nátıjeleri boıynsha Pixel Networks tehnologııalaryn engizýdi keńeıtý týraly sheshim qabyldanatyn bolady, — dedi Qanat Bozymbaev.
Aıta keteıik, Alataý qalasyn damytýǵa baǵyttalǵan úsh strategııalyq qujat 2026 jyldyń sońyna deıin bekitilmek.
