«Alataý-qus» asyl tuqymdyq bazany damytýǵa 6,5 mlrd teńge ınvestıtsııa salady
ASTANA. KAZINFORM - Qazaqstanda qus sharýashylyǵy salasynyń óndiristik jáne tehnologııalyq derbestigin nyǵaıtý baǵytyndaǵy jumystar jalǵasyp jatyr. Bul rette otandyq asyl tuqymdyq bazany damytý jáne ınkýbatsııalyq jumyrtqa óndiretin óndiris oryndaryn qalyptastyrý negizgi baǵyttardyń biri, dep habarlaıdy QR Aýyl sharýashylyǵy mınıstrliginiń baspasóz qyzmeti.
Osy baǵytta «Alataý-qus» aktsıonerlik qoǵamy quny 6,5 mlrd teńgeni quraıtyn asyl tuqymdy reprodýktor salý jónindegi ınvestıtsııalyq jobany júzege asyryp jatyr. Keshen Almaty oblysynyń Arna aýylynda salynyp jatyr.
Joba tolyq aıaqtalǵannan keıin kásiporyn jylyna 12 mln danaǵa deıin ınkýbatsııalyq jumyrtqa óndire alady. Jeke asyl tuqymdyq bazanyń qurylýy «Alataý-qusqa» ınkýbatsııalyq jumyrtqaǵa degen ishki qajettilikti qamtamasyz etýge, óndiristik úderisterdi basqarý tıimdiligin arttyrýǵa jáne syrtqy jetkizilimderge táýeldilikti kezeń-kezeńimen azaıtýǵa jol ashady.
Óz óndirisińniń bolýy óndiris kólemin neǵurlym dál josparlaýǵa, asyl tuqymdyq materıaldyń sapasyn baqylaýdy kúsheıtýge jáne qus ósirýden bastap daıyn ónim shyǵarýǵa deıingi búkil óndiristik tizbektiń turaqtylyǵyn arttyrýǵa múmkindik beredi.
-Jobany iske asyrý kezinde veterınarııalyq jáne bıologııalyq qaýipsizdik máselelerine erekshe mán berilip otyr. Asyl tuqymdy reprodýktor qoldanystaǵy veterınarııalyq-sanıtarııalyq talaptardy eskere otyryp jobalanyp otyr. Nysan qustardy ustaý jaǵdaılaryn, ónim sapasyn jáne bıologııalyq qaýipsizdik talaptarynyń saqtalýyn baqylaýǵa arnalǵan zamanaýı júıelermen jabdyqtalady,-delingen habarlamada.
Jobanyń iske asyrylýy agroónerkásiptik keshendi odan ári damytý jáne Qazaqstannyń azyq-túlik qaýipsizdigin nyǵaıtý mindetterine sáıkes keledi. Qus sharýashylyǵy úshin turaqty ishki óndiristik bazany qalyptastyrý strategııalyq mańyzǵa ıe. Bul baǵyt otandyq asyl tuqymdy qordy, jemshóp bazasyn damytý, zamanaýı tehnologııalardy engizý jáne óndiris áleýetin nyǵaıtýdy qamtıdy.
Osyǵan deıin Qazaqstanda otandyq qus etiniń úlesi 78%-ǵa deıin artqany týraly jazdyq.
