Alataý Qazaqstandaǵy tolyq tsıfrlanǵan alǵashqy qala bolady — Prezıdent
ASTANA. KAZINFORM — Memleket basshysy Qasym-Jomart Toqaev Sheteldik ınvestorlar keńesiniń 38-shi plenarlyq otyrysynda Alataý qalasyn damytýdy taǵy bir mańyzdy mindet ekenin aıtty. Onyń aıtýynsha, Alataý Qazaqstandaǵy tolyq tsıfrlanǵan alǵashqy qala retinde damıdy. Onda memlekettik qyzmetter, ınfraqurylym men ekonomıka biryńǵaı tsıfrlyq ekojúıege biriktirilip, ınvestorlar úshin álemdik deńgeıdegi qolaıly quqyqtyq orta qalyptasady.
— Búginde Alataý álemdik deńgeıdegi arnaýly quqyqtyq rejımge ıe, qarqyndy damıtyn aýmaq bolyp bekitildi. Dúnıe júzinen ınvestıtsııa tartý jáne Alataýdy halyqaralyq iskerlik ortalyqtardyń birine aınaldyrý maqsatynda normatıvtik baza jasaqtaldy. Shahardy Qazaqstandaǵy tolyq tsıfrlanǵan alǵashqy ortalyq retinde jobalap jatyrmyz, — dedi Memleket basshysy.
Mundaǵy asa mańyzdy ınfraqurylym, memlekettik qyzmetter men qala ekonomıkasy úlken derekqor, ozyq tehnologııa jáne zamanaýı basqarý modeli negizinde jumys isteıtin birtutas tsıfrlyq ekojúıege biriktiriledi. «Digital by default» qaǵıdatyna sáıkes, memlekettik basqarýdyń barlyq úderisi áýel bastan tek tsıfrlyq formatta jasalady.
— Alataý qalasy ákimshiliginiń biryńǵaı tsıfrlyq platformasy arqyly turǵyndar men ınvestorlar memlekettik qyzmetterge júginip, tıisti ruqsattama qujattaryn rásimdeı alady, arnaýly quqyqtyq rejımniń artyqshylyqtaryn paıdalanady. Budan bólek, qaladaǵy tsıfrlyq aktıvter salasynda krıptovalıýta bırjalary men aktıvterdi tokendeý qyzmetterin retteıtin ozyq normatıvtik-quqyqtyq baza jumys isteıdi. Biz halyqaralyq ınvestorlardy osy biregeı ıýrısdıktsııanyń artyqshylyqtaryn joǵary tehnologııalyq jáne tabysty jobalardy júzege asyratyn senimdi alań retinde paıdalanýǵa shaqyramyz, — dedi Qasym-Jomart Toqaev.
Prezıdenttiń pikirinshe, jasandy ıntellektini damytý jáne tsıfrlyq derbestikti nyǵaıtý ekonomıkamyzdyń, tipti memlekettiń uzaqmerzimdi ornyqtylyǵyn qamtamasyz etý turǵysynan erekshe mánge ıe.
— Keńes pen memlekettik organdardyń turaqty dıalogy óte mańyzdy ekenin atap ótkim keledi. Tıimdi sheshimder ázirlep, qajetti reformalar júrgizý úshin barlyq qatysýshynyń tájirıbesi men bilimin, sarapshylyq áleýetin jumyldyrǵan jón. Memleket pen bıznestiń uzaqmerzimdi ári ózara tıimdi seriktestigi tsıfrlyq ekonomıka múmkindikterin tolyq paıdalanýǵa jáne azamattarymyzdyń ıgiligi úshin órkendegen memleket qurýǵa yqpal etetin negizgi faktor bolatynyna senimdimin, — dedi Memleket basshysy.
Aıta keteıik, elordada QR Prezıdenti janyndaǵy Sheteldik ınvestorlar keńesiniń 38-otyrysy ótti. Onda Qasym-Jomart Toqaev Sheteldik ınvestorlar keńesiniń jańa múshelerin tanystyrǵan edi.
