Alataý Qazaqstan men Ortalyq Azııanyń ınvestıtsııalyq, ınnovatsııalyq ortalyǵyna aınalady – Qanat Bozymbaev
ASTANA. KAZINFORM – Úkimet Alataý qalasynyń ınvestıtsııalyq tartymdylyǵyn arttyrý maqsatynda Astana halyqaralyq qarjy ortalyǵy modelin qoldanýdy qarastyryp jatyr. Bul týraly Premer-mınıstrdiń orynbasary Qanat Bozymbaev málim etti.
- Búginde Alataý qalasyna erekshe mártebe berý jumysy júrip jatyr, bul qalany eldiń ekonomıkalyq ósý ortalyǵy retinde qalyptastyrýǵa yqpal etedi. 90 myń gektardan astam aýmaq tolyqqandy ekojúıeni, iskerlik, jasyl, ındýstrııalyq jáne ǵylymı ortany qurýǵa múmkindik beredi. Investıtsııalyq tartymdylyqty arttyrý maqsatynda Úkimet bul jobaǵa Astana halyqaralyq qarjy ortalyǵy modelin qoldaný múmkindigin qarastyrdy. Organıkalyq aýyl sharýashylyǵy ónimderin ótkizýge arnalǵan halyqaralyq eksporttyq alańǵa aınalatyn agroprotsessıngtik logıstıkalyq hab qurylady, - dedi Qanat Bozymbaev elordada ótip jatqan Astana Finance Day – 2025 halyqaralyq forýmynda.
Sondaı-aq vıtse-premer Alataý qalasynda halyqaralyq bilim, medıtsına jáne týrızm ortalyǵyn qurý josparda baryn aıtty.
- Ortalyqtar iskerlik bastamalardyń, joǵary bilikti kadrdyń jáne kreatıvti komandalardyń basty tartylys núktesine aınalyp, búkil qala ekonomıkasyna qýatty mýltıplıkatıvtik áser beredi. Bıznes qajettilikke beıimdelgen zamanaýı ınfraqurylymnyń, bıznesti júrgizýdiń ashyq ári turaqty jaǵdaı jáne memlekettik qoldaýdyń arqasynda Alataý qalasy Qazaqstan men Ortalyq Azııanyń basty ınvestıtsııalyq jáne ınnovatsııalyq ortalyqtarynyń birine aınalady, - deıdi ol.
Eske sala keteıik, bıyl Alataý qalasynda 10 ınvestıtsııalyq jobanyń qurylysy bastalady.
Odan bólek Alataý qalasynda 73 mlrd teńgege kólik-logıstıka ortalyǵy salynady.