Alataý qalasynyń jer qatynastary arnaıy rejım arqyly retteledi
ASTANA. KAZINFORM — Alataý qalasynda ınvestorlarǵa jer ýchaskeleri bıznes lıtsenzııa nemese kelisimshart negizinde beriledi. Bul týraly Parlament palatalarynyń birlesken otyrysynda Premer-mınıstrdiń orynbasary Qanat Bozymbaev aıtty.
— Qalanyń damýy strategııalyq qujattarǵa negizdeledi. Olar: 30 jylǵa arnalǵan uzaq merzimdi damý jospary jáne 15 jyldyq strategııa men master jospar. Investorlar úshin turaqtylyqty saqtaý maqsatynda atalǵan qujattarǵa ózgerister tıisinshe 10 jáne 5 jyl ishinde bir retten jıi engizilmeıdi, — dedi Úkimet basshysynyń orynbasary.
Vıtse-premerdiń aıtýynsha, jer qatynastary arnaıy rejım arqyly retteledi. Qalanyń jer qory qalyptastyrylady.
— Bul strategııalyq jáne ınvestıtsııalyq jobalardy iske asyrýdyń negizgi quraly jáne damý men ekonomıkalyq ósýdiń resýrsy retinde qarastyrylady. Investorlarǵa jer ýchaskeleri bıznes lıtsenzııa nemese kelisimshart negizinde beriledi. Jerdi paıdalaný sharttary naqty ınvestıtsııalyq mindettemelermen tikeleı baılanysty bolady, — dedi Qanat Bozymbaev.
Aıta keteıik, Parlament palatalarynyń birlesken otyrysynda depýtattar «Alataý qalasynyń arnaýly mártebesi týraly» Qazaqstan Respýblıkasy Konstıtýtsııalyq zańynyń jobasyn birinshi oqylymda qarap jatyr.
