Alataý qalasynyń keńesi quramyn Prezıdent bekitedi

ASTANA. KAZINFORM — Májilis depýtaty Nurtaı Sabılıanov «Alataý qalasynyń arnaýly mártebesi týraly» Konstıtýtsııalyq zań jobasyn talqylaýda arnaıy Keńes pen ákimshilik quzyretteri jóninde baıandady. 

15 naýryzdaǵy respýblıkalyq referendýmda qabyldanǵan Jańa Konstıtýtsııada «qarqyndy damıtyn qala» arnaýly quqyqtyq rejımi» bekitilgen bolatyn.

— Zań jobasy qalany basqarýdyń tıimdi júıesin qalyptastyrýdy kózdeıdi. Alataý qalasynyń keńesi — joǵary organ bolyp sanalady. Keńes qalany damytýdyń strategııalyq baǵyttaryn aıqyndaıdy jáne Alataýdyń memlekettik organdaryn úılestirýdi qamtamasyz etedi. Keńestiń quramyn Prezıdent bekitedi jáne al ony Premer-mınıstr basqarady, — dedi depýtat Parlament palatalarynyń birlesken otyrysynda.

Negizgi atqarýshy organ, ákimshilikti — memlekettik qor nysanyndaǵy memlekettik organ retinde aıqyndaý usynyldy. Oǵan kásipkerlikti damytý boıynsha barlyq ókilettik beriledi, ol ınvestıtsııalyq jobalar men ınfraqurylymdyq damýdy retteýshi fýnktsııalaryn oryndaıdy.

— Zań jobasynda Alataýdyń ınvestıtsııalyq qatynastar, kásipkerlik qyzmet, qala qurylysy salasy, tsıfrlyq ákimshilendirý máselelerinde óz aktilerin qabyldaý kózdeledi. Alataý qalasynyń damýyna járdemdesý úshin Almaty qalasy men Almaty oblysynyń jergilikti atqarýshy organdary ákimshilikpen jergilikti mańyzy bar máselelerdi birlesip sheshý týraly kelisim jasasýǵa quqyly, — dedi Nurtaı Sabılıanov.

Aıta keteıik, Alataý qalasyndaǵy negizgi strategııalyq sheshimderdi Premer‑mınıstr basqaratyn keńes aıqyndaıdy. Investorlardyń quqyqtary halyqaralyq deńgeıde qorǵalady. Al salyq jeńildikteri tek basym salalardaǵy jańa ınvestıtsııalyq jobalarǵa beriledi.

Buǵan deıin Premer-mınıstr orynbasary Qanat Bozymbaev qandaı jaǵdaıda sheteldik ınvestordan jer qaıtaryp alynatynyn túsindirgen edi.