Alataý qalasynyń bıýdjeti qandaı túsimderden tolyqtyrylady
ASTANA. KAZINFORM — Májilis depýtaty Nurtaı Sabılıanov Alataý qalasynyń negizgi qaǵıdattaryn túsindirdi jáne qala bıýdjeti qandaı túsimderden quralatynyn aıtyp berdi.
Onyń aıtýynsha, ashyqtyq qaǵıdaty ákimshiliktiń, máslıhattyń jáne ákimdiktiń qabyldanǵan sheshimder men aktiler týraly aqparatty qalanyń resmı ınternet-resýrstarynda ashyqtyǵy men qoljetimdiligin qamtamasyz etedi.
— Al «Biryńǵaı tereze» qaǵıdaty aqparattyq júıeler arqyly iske asyrylady jáne bıýrokratııalyq rásimderdi tómendetýge (bıznesti tirkeý, ruqsattar alý kezinde kelisimderdi azaıtý, ınfraqurylymǵa qosylý), ınvestıtsııalyq jobalardy iske qosýdy jedeldetýge, bıznesti júrgizýdi jeńildetýge baǵyttalǵan, — dedi Nurtaı Sabılıanov Parlament palatalarynyń birlesken otyrysynda.
Sonymen birge, zań jobasynda «tsıfrlyq bastapqylyq» qaǵıdaty engizilip otyr. Alataý «aqyldy» qala retinde tsıfrlyq ekonomıkaǵa, IT-sektorǵa, ǵylymı ortalyqtar men tehnoparkter qurýǵa jáne joǵary tehnologııalyq óndiriske baǵyttalǵan.
— Alataý qalasynyń jıyntyq bıýdjeti qalanyń jergilikti bıýdjeti men ákimshiliktiń bıýdjetinen turady. Jergilikti bıýdjet jeke tabys salyǵy, áleýmettik salyq, múlik salyǵy, kólik quraldaryna salynatyn salyq, Almaty oblysynyń jergilikti bıýdjetinen beriletin transfertter jáne ózge de salyqtary men alymdary esebinen qalyptasady. Bul túsimder jergilikti memlekettik basqarýdy qamtamasyz etýge jáne áleýmettik salany qarjylandyrýǵa jumsalady, — dedi depýtat.
Ákimshilik bıýdjeti korporatıvtik tabys salyǵy, qosylǵan qun salyǵy, ózge de tólemder men alymdar, sondaı-aq respýblıkalyq bıýdjetten túsetin túsimder esebinen túzilmek.
Bul túsimder ekonomıkalyq qyzmetten túsetin kiristerdi shoǵyrlandyrýǵa jáne olardy Alataý qalasynyń qarqyndy damýyna baǵyttaýǵa múmkindik beredi. Bul rette mindetti syrtqy aýdıt jáne bıýdjettiń oryndalýy týraly toqsan saıynǵy turaqty jarııa esep berý engiziledi.
— Alataý qalasy Keńesiniń sheshimi boıynsha ınvestıtsııalyq jobalar úshin salyqtyq preferentsııalar berilýi múmkin. Bul rette Alataý rezıdentteriniń ınvestıtsııalyq mindettemeleriniń somalary, sondaı-aq olarǵa berilgen jeńildikter, bosatýlar men preferentsııalar týraly málimetter ashyq qoljetimdi bolýy qajet, — dedi Májilis depýtaty.
Aıta keteıik, Alataý qalasyndaǵy negizgi strategııalyq sheshimderdi Premer‑mınıstr basqaratyn Keńes aıqyndaıdy. Investorlardyń quqyqtary halyqaralyq deńgeıde qorǵalady. Al salyq jeńildikteri tek basym salalardaǵy jańa ınvestıtsııalyq jobalarǵa beriledi.
Buǵan deıin Premer-mınıstr orynbasary Qanat Bozymbaev qandaı jaǵdaıda sheteldik ınvestordan jer qaıtaryp alynatynyn túsindirgen edi.
