«Alataý qalasynyń arnaıy mártebesi týraly» zań naýryz aıynyń sońyna deıin qabyldanady

— Jańa Konstıtýtsııadaǵy ekonomıkalyq ósý — uzaq merzimdi damýǵa negizdelgen, boljamdy, ashyq jáne turaqty quqyqtyq ortany qalyptastyrady. Bilim berýdi, ǵylymdy, ınnovatsııalardy jáne adamı kapıtaldy damytý memlekettiń strategııalyq baǵyty retinde bekitilgen, ıaǵnı, básekege qabilettilik ıntellekt, tehnologııalar jáne kásibılik arqyly qalyptasatyn bilim ekonomıkasynyń irgetasyn qalaıdy. Jańa Konstıtýtsııa barlyq menshik nysandarynyń teń qorǵalýyn bekitetinin atap ótken jón. Bul ınvestorlar, kásipkerler, shaǵyn jáne orta bıznes úshin erekshe mańyzdy, — dedi vıtse-premer.

Onyń aıtýynsha, jańa Konstıtýtsııanyń normalaryn iske asyrý aıasynda Ulttyq ekonomıka mınıstrligi «Alataý qalasynyń arnaıy mártebesi týraly», «Qazaqstan Respýblıkasynyń ákimshilik-aýmaqtyq qurylysy týraly», «Qazaqstan Respýblıkasy astanasynyń mártebesi týraly» Konstıtýtsııalyq zańdardyń jobalaryn ázirledi. 

— Jańa Konstıtýtsııada jekelegen óńirleriniń ekonomıkasyn qarqyndy damytý maqsatynda konstıtýtsııalyq zańdarmen qarjy salasynda arnaıy quqyqtyq rejım nemese «qarqyndy damý qalasynyń» arnaıy quqyqtyq rejımi belgilenýi múmkin ekendigi kózdelgen. Osy oraıda Memleket basshysynyń 2025 jylǵy Joldaýyna sáıkes ázirlengen «Alataý qalasynyń arnaıy mártebesi týraly» Konstıtýtsııalyq zań jobasy atalǵan baǵyttardy qamtıdy, — dedi Serik Jumanǵarın.

Vıtse-premerdiń dereginshe, Konstıtýtsııalyq zań jobasy:

— jergilikti memlekettik basqarý organdarynyń qurylymy men ókilettikterin aıqyndaýdy;

— ozyq halyqaralyq jáne sheteldik standarttardy, tehnıkalyq reglamentterdi jáne tehnologııalyq normalardy qoldanýdy;

— tsıfrlyq aktıvterdiń aınalymyn retteýdi;

— shaǵyn bıiktiktegi ekonomıka salasyn jáne elektrondy ushqysh apparattardy damytýdy;

— ınvestıtsııalardy qorǵaýǵa jáne olardyń turaqtylyǵyna kepildik berýdi;

— salyq salýdyń jáne bıýdjettik qatynastardyń erekshe rejımin qoldanýdy kózdeıdi.

— Qazirgi ýaqytta Konstıtýtsııalyq zań jobasy Parlamenttiń qaraýynda. Osy jyldyń 20 naýryzynda zań jobasy boıynsha Parlament palatalarynyń birlesken otyrysynyń 1-shi oqylymyn, al 27 naýryzda 2-shi oqylymyn ótkizý josparlanýda. Zań jobasy naýryz aıynyń sonyna deıin Memleket basshysyna qaraýyna engiziletin bolady, — dedi ol.

Aıta keteıik, Úkimet jańa Konstıtýtsııa normalaryn júzege asyrý joldaryn talqylap jatyr.