Alataý qalasynyń ákimdigi nelikten eki bólek otyr

QONAEV. KAZINFORM — Almaty oblysy Óńirlik kommýnıkatsııalar qyzmetiniń alańynda Alataý qalasynyń ákimi Árken Ótenov jańadan qurylǵan shaharǵa baılanysty suraqtarǵa jaýap berdi.

Qala basshysy ákimdiktiń ǵımaraty nelikten Alataý qalasynyń negizgi aýmaǵy men Qoıanqus aýylynda bólinip ornalasqanyn túsindirdi.

— Bizde qalanyń uzyndyǵy 50 shaqyrymdaı. Biz Almaty qalasynan bastap Qonaev qalasyna deıingi tóńirekte ornalasqanbyz. Sondyqtan halyqqa yńǵaıly bolsyn dep ákimdik eki jerde ornalasqan. Mysaly, qalanyń bas jaǵynda 25 myńdaı adam, al Jetigen aımaǵynda 30 myńdaı adam turady. Jetigendegi ǵımaratymyzda qyzmetkerlerimizdiń 30-40%-y otyrady. Qalǵan 60-70%-y Qoıanqusta ornalasqan, — dedi ol.

Alataý ákiminiń aıtýynsha, Almaty qalasynyń mańyndaǵy Jańatalap, Qoıanqus, Yntymaq tóńiregindegi turǵyndar Qoıanqustaǵy ákimdikke, al Zarechnyı, Arna, Jetigen, Qaırat turǵyndary burynǵy Jetigendegi ákimdikke barady.

— Osy eki jerde de turǵyndar qujattaryn retteı alady. Eki ortalyqta da jer mamany, arhıtektor mamandar bar, — dedi ákim.

Eske salaıyq, buǵan deıin Alataý qalasyn salýǵa qarajat qaıdan alynatynyn jazǵanbyz.