Alataý qalasyndaǵy negizgi strategııalyq sheshimderdi arnaıy keńes qabyldaıdy
ASTANA. KAZINFORM — Alataý qalasyndaǵy negizgi strategııalyq sheshimderdi Premer‑Mınıstr basqaratyn Keńes aıqyndaıdy. Investorlardyń quqyqtary halyqaralyq deńgeıde qorǵalady. Al salyq jeńildikteri tek basym salalardaǵy jańa ınvestıtsııalyq jobalarǵa beriledi. Premer-mınıstrdiń orynbasary Qanat Bozymbaev «Alataý qalasynyń arnaýly mártebesi týraly» Konstıtýtsııalyq zań jobasynyń negizgi baǵyttary týraly aıtyp berdi.
Onyń aıtýynsha, Prezıdent birneshe ret erekshe quqyqtyq mártebe artyqshylyq emes, qajetti qural ekenin atap ótti. Usynylyp otyrǵan zań jobasy osy qaǵıdatqa negizdelgen.
— Konstıtýtsııalyq zań negizinde Alataýda arnaıy quqyqtyq rejım qalyptasady. Ol kásipkerlik qyzmettiń negizgi baǵyttaryn qamtıdy. Nátıjesinde Alataý jańa basqarý jáne tehnologııalyq sheshimderdi engizýge múmkindik beretin zamanaýı retteýshi alańǵa aınalady, — dedi Q. Bozymbaev Parlament palatalarynyń birlesken otyrysynda.
Qalada synaqtan ótken tıimdi tetikter aldaǵy ýaqytta Qazaqstannyń basqa óńirlerinde de taralýy múmkin. Halyqaralyq tájirıbede mundaı jobalar «charter cities» dep atalady.
Sonymen birge, Alataý qalasynda tek salyqtyq jeńildikter ǵana emes, bıznesti retteý, ınvestorlardy tartý jáne ınvestıtsııalyq daýlardy sheshý júıesin qamtıtyn tolyq ekojúıe qalyptastyrý josparlanyp otyr.
— Eń aldymen Alataýdy basqarý júıesi — Alatau City Authority strategııalyq damýǵa negizdelgen jańa memlekettik organ retinde qurylady. Onyń negizgi baǵytyn Premer‑Mınıstr basqaratyn Keńes aıqyndaıdy. Al ákimshilik jumysty Bas atqarýshy dırektor júzege asyrady, — dedi Premer orynbasary.
Keńes qaladaǵy negizgi strategııalyq sheshimderdi qabyldaıdy jáne ákimshilik aktilerdi bekitedi. Al máslıhat pen ákimdik qalanyń áleýmettik, kommýnaldyq jáne qoǵamdyq máselelerine jaýap beredi.
— Investıtsııalyq saıasatqa kelsek, zań jobasynda ınvestıtsııalyq kelisimderdiń turaqtylyǵy, arnaıy quqyqtyq rejımniń basymdyǵy jáne lıtsenzııalaýdyń jeke tártibi qarastyrylǵan. Sondaı‑aq «bir tereze» qaǵıdaty arqyly táýelsiz retteý júıesi engiziledi, — dedi Q. Bozymbaev.
Investorlardyń quqyqtary halyqaralyq deńgeıde qorǵalady. Olar Astana qarjy ortalyǵynyń nemese halyqaralyq arbıtrajdy tańdaı alady.
— Úshinshiden, turaqty jáne boljamdy salyqtyq model qalyptasady. Salyqtyq preferentsııalar tek basym salalardaǵy jańa ınvestıtsııalyq jobalarǵa beriledi. Bul jobalar negizgi krıterıılerge sáıkes bolýy tıis, olar: ekonomıkalyq jáne áleýmettik tıimdiligi; qalanyń strategııalyq qujattaryna sáıkestigi; eksportqa baǵdarlanýy jáne ınnovatsııalyq sıpattylyǵy; ekologııalyq talaptardy qamtýy, — dep túsindirdi spıker.
Barlyq jeńildikter men ınvestorlardyń mindettemeleri ashyq túrde jarııalanatyn bolady.
Aıta keteıik, elordada Parlament palatalarynyń birlesken otyrysy bastaldy. Jıynda Májilis pen Senat depýtattary «Alataý qalasynyń arnaýly mártebesi týraly» Qazaqstan Respýblıkasy Konstıtýtsııalyq zańynyń jobasyn birinshi oqylymda qarap jatyr.
Bıyl qańtar aıynda Parlament Májilisi «Alataý qalasynyń arnaýly mártebesi týraly» Konstıtýtsııalyq zańynyń jobasyn talqylaýǵa qabyldaǵanyn jazǵan edik.
