Alataý qalasynda jasandy ıntellekt pen ozyq tehnologııalar shoǵyrlanady
ASTANA. KAZINFORM — Prezıdent Koreıanyń iskerlik top ókilderine Alataý qalasyn damytý maqsatynda qabyldanyp jatqan dáıekti sharalar týraly málimet berdi. Bul týraly Aqorda málim etti.
Jańa ortalyq ozyq ónerkásip salalary pen ınnovatsııa shoǵyrlanǵan ýrbanıstik jáne ekonomıkalyq habqa aınalýdy kózdeıdi.
— Tsıfrlyq tehnologııalarǵa, jasandy ıntellektige jáne zamanaýı ınjenerııaǵa negizdelgen qalany órkendetýge koreıalyq seriktester belsendi atsalysyp jatyr. KIND korporatsııasymen birge bas jospardy jáne turǵyn úı aýdandaryn jobalaýmen, sondaı-aq basqa da koreıalyq kompanııalardy aýqymdy jobaǵa tartýmen aınalysyp jatyrmyz, — dedi Qasym-Jomart Toqaev.
Memleket basshysynyń pikirinshe, eki eldiń seriktestigin ilgeriletetin perspektıvti baǵyttardyń biri — qarjy sektory. Sondaı aq ol aýyl sharýashylyǵy men tamaq ónerkásibiniń de mańyzyna nazar aýdardy.
— Bizdiń ónimderimiz álemniń 70-ten asa eline tasymaldanady. Biz Koreıaǵa jetkiziletin bıdaı, maıly daqyldar, et, sút ónimderiniń, bal jáne basqa da joǵary sapaly taýarlardyń eksport kólemin ulǵaıtýǵa ázirmiz. Sondaı-aq Qazaqstannyń aýyl sharýashylyǵy áleýetin Koreıanyń tehnologııalarymen biriktirip, agroónerkásip salasyndaǵy qosylǵan qun tizbegin qalyptastyrýdy usynamyz. Tamaq ónerkásibinde yntymaqtastyqtyń berik negizi qalandy. Lotte Qazaqstannyń tanymal shokolad brendteriniń biri «Rahat» kompanııasyna ınvestıtsııa salǵany belgili. Bul koreıalyq bıznestiń bizdiń naryqtaǵy uzaqmerzimdi kásibine jarqyn mysal bola alady. Biz atalǵan yqpaldastyqty joǵary baǵalaımyz jáne tabystarymyz eselene beredi dep senemiz, — dedi Prezıdent.
Eske sala keteıik, Qasym-Jomart Toqaev Koreıa Respýblıkasyna memlekettik saparmen bardy.
Prezıdent Qasym-Jomart Toqaev Koreıanyń birqatar azamatyn marapattady.
Toqaev pen Pan Gı Mýn BUU reformasy týraly pikir almasty.
