Alataý qalasynda jańa basqarý organdary qurylady
ASTANA. KAZINFORM — Oljas Bektenov Alataý qalasy keńesiniń otyrysyn ótkizdi. Onda Memleket basshysynyń jańa qalany damytý jónindegi tapsyrmalaryn júzege asyrý barysy talqylandy, dep habarlaıdy Úkimettiń baspasóz qyzmeti.
QR Premer-mınıstri Oljas Bektenovtiń tóraǵalyǵymen Alataý qalasy keńesiniń otyrysy ótti. Onda «Alataý qalasynyń arnaýly quqyqtyq rejımi týraly» Qazaqstan Respýblıkasynyń Konstıtýtsııalyq zańyn júzege asyrý jáne jańa qalany odan ári damytý máseleleri qaraldy. Oljas Bektenov bıylǵy 1 shildeden bastap kúshine engen Konstıtýtsııa aýqymdy prezıdenttik reformalardyń jalǵasy ekenin jáne ekonomıkany odan ári jańǵyrtý úshin berik negiz qalaıtynyn atap ótti. Bul turǵyda ınvestıtsııalar tartýǵa, ozyq basqarý sheshimderin engizýge jáne qalanyń jańa modelin qurýǵa baǵyttalǵan Alatau City jobasy erekshe mańyzǵa ıe.
— Negizgi zańmen birge «Alataý qalasynyń arnaýly quqyqtyq rejımi týraly» Konstıtýtsııalyq zań kúshine endi. Memleket basshysynyń tapsyrmasyna sáıkes Alatau City jobasy ekonomıkalyq damý draıverleriniń biri bolýy tıis. Memleket basshysynyń Jarlyǵymen Alataý qalasynyń keńesi quryldy. Keńestiń negizgi mindeti — arnaýly quqyqtyq rejımdi ýaqtyly jáne sapaly iske asyrýdy qamtamasyz etý, — dep atap ótti Úkimet basshysy.
Alatau City Authority bas atqarýshy dırektory Alısher Abdyqadyrov uıymnyń aǵymdaǵy qyzmeti jáne Alataý qalasyn odan ári damytý josparlary týraly baıandady.
Qazir qalanyń normatıvtik quqyqtyq bazasyn qalyptastyrý, strategııalyq qujattardy ázirleý, memlekettik basqarýdyń zamanaýı júıesin qurý, ınvestıtsııalar tartý jáne ınvestıtsııalyq jobalardy súıemeldeý boıynsha jumystar júrgizilip jatyr.
Alataýdyń qazirgi bar eldi mekenderiniń ınjenerlik jáne kólik ınfraqurylymyn damytý boıynsha jumystar jalǵasyp keledi, olar — Yntymaq, Qoıanqus, Jetigen, Jańadáýir, Jańatalap shaǵyn aýdandary.
Osy jyldyń sońyna deıin qalany damytýdyń 2055 jylǵa deıingi uzaq merzimdi josparyn, jetekshi halyqaralyq konsaltıngtik ARUP jáne BCG kompanııalaryn tarta otyryp, 2040 jylǵa deıingi Damý strategııasy men Master-jospardy ázirleýdi aıaqtaý josparlanǵan.
K-Smart City, Alatau AI-Driven City jáne Alatau Crypto City jobalaryna nazar aýdaryldy. K-Smart City sheńberinde pılottyq joba retinde Ońtústik Koreıanyń tájirıbesi boıynsha ozyq smart-tehnologııalardy qoldana otyryp, aýdany 330 gektar bolatyn jerge ózin-ózi qamtamasyz etetin aýdan qurý kózdelgen.
Al Alatau AI-Driven City tujyrymdamasy naqty ýaqyt rejıminde qalalyq protsesterdi basqarý úshin tsıfrlyq syńardy, Big Data jáne jasandy ıntellektini engizýdi qarastyrady. Alatau Crypto City boıynsha tokenızatsııa jáne qalanyń Web3-ekojúıesin qalyptastyrý boıynsha jobalar júzege asyrylatyn bolady.
Jalpy, Alatau City Authority derekteri boıynsha 51 myń jumys orny ashylatyn 2 trln teńge somasyna 53 ınvestıtsııalyq jobadan turatyn pýl qalyptastyryldy. Negizgi jobalardyń qatarynda quny $1 mlrd-tan asatyn Iconic Complex, PepsiCo, Mars, Hyundai Green Food óndiristeri, Khan Tengri Biopharma bıofarmatsevtıkalyq zaýyty, AutoFlight pen Joby kompanııalarymen birlesken qalalyq áýe mobıldigi jobalary, sondaı-aq KAIST ýnıversıtetiniń kampýsyn salý jobasy bar. 2026 jyldyń sońyna deıin tokenızatsııalaý boıynsha alǵashqy jobalardy iske qosý, rezıdentterdi tartý jáne vırtýaldy ári naqty ekonomıkany biriktiretin biryńǵaı keńistik qalyptastyrý josparlanyp otyr.
Kún tártibindegi máselelerdi qaraý qorytyndysy boıynsha Keńes birqatar sheshim qabyldady:
- Uıymnyń quqyqtyq mártebesin, ókilettikterin jáne basqarý júıesin aıqyndaıtyn Alatau City Authority týraly ereje bekitildi.
Osyǵan sáıkes, Alatau City Authority memlekettik qory basqarmanyń arnaıy uıymy — Alataý qalasynyń jumys isteýi men damýyna jaýapty memlekettik organ bolyp qaıta qurylady.
- Qalany tıimdi basqarýdy qamtamasyz etý úshin Jedel komıtet pen Retteýshi komıssııa qurý týraly sheshim qabyldandy.
Jedel komıtet ýaqtyly sheshim qabyldaýdy talap etetin máselelerdi qaraıtyn bolady. Retteýshi komıssııa normatıvtik quqyqtyq aktilerdi bekitedi, sondaı-aq arnaıy quqyqtyq rejım sheńberinde ozyq halyqaralyq praktıkalardy engizetin bolady.
- Ótpeli kezeń máselelerin retteý maqsatynda Keńes Alataý qalasy ákimdiginiń janynan Jer qatynastary jónindegi ýaqytsha komıssııa qurýdy qoldady.
Komıssııanyń mindetterine qalanyń master-jospary bekitilgenge deıin basym ınvestıtsııalyq jobalardy súıemeldeý de kiredi. Komıssııanyń mindetterine qalanyń master-jospary bekitilgenge deıin basym ınvestıtsııalyq jobalardy súıemeldeý de kiredi.
Premer-mınıstr memlekettik organdar men Alatau City Authority-ge qalany damytýdyń negizgi baǵyttary boıynsha jumystardy jedeldetýdi tapsyrdy.
Buǵan deıin Memleket basshysy Alataý qalasyn damytýǵa qatysty Jarlyqqa qol qoıǵanyn jazǵanbyz.
