Alataý qalasynda zańsyz qaldyq tógýge qarsy qatań sharalar qabyldandy
ASTANA. KAZINFORM — QR Ekologııa jáne tabıǵı resýrstar mınıstrligi qaldyqtardy belgilengen aýmaqtardan tys jerge tastaýǵa tyıym salynatynyn málimdeıdi.
Alataý qalasynyń mańyndaǵy Almaty-Óskemen tas jolynda zańsyz qaldyq tógý faktisi tekserildi. «PepsiCo Central Asia» kompanııasyna qurylys júrgizgen bas merdiger «Nur Astana Qurylys» JShS osy buzýshylyq úshin jaýapty bolyp shyqty.
Quqyq buzýshylyqqa qatysty ákimshilik hattama toltyrylyp, qysqartylǵan tártippen aıyppul salyndy. Buzýshylyqqa sebep bolǵan jaǵdaılardy joıý úshin arnaıy habarlama berildi, alańda qatań ekologııalyq baqylaý engizildi.
Sonymen qatar, qaldyqtardy basqarýda ishki baqylaý júıesi qurylyp, personal qaıta oqytyldy. Árbir qyzmetkerdiń jeke jaýapkershiligi aıqyndaldy.
— Zańsyz qoqys tógýge jol joq. Aıyppuldar eki esege kóbeıtilip, zańsyz qaldyq tasıtyn kólikter tárkilenedi. Qorshaǵan ortany qorǵaý zańyn saqtaý ári baqylaý kúsheıtildi, — dep eskertedi mınıstrlik.
Buǵan deıin SQO-da sońǵy bes jylda ruqsatsyz qoqys oryndary bes ese qysqarǵanyn jazǵan edik.