Alataý qalasynda tanymal kásiporyn qaldyqtardy zańsyz kómgen
ALATAÝ. KAZINFORM – Alataý qalasynda óndiristik qaldyqtardy zańsyz jerge kómý derekteri anyqtaldy.
Áleýmettik jelide tanymal sýsyndardy, chıpsy men basqa ónimderdi óndiretin PepsiCo kompanııasy zaýyttan shyqqan qaldyqtaryn Alataý qalasynyń «Yntymaq» shaǵyn aýdanynda zańsyz jerge kómgeni týraly beınejazba tarady.
Bul derekke qatysty Almaty oblysynyń ákimdigi túsinikteme berdi. Resmı málimetke sáıkes, 2025 jyldyń 30 jeltoqsanynda Alataý qalasynyń ákimdigi atalǵan faktke baılanysty PepsiCo kompanııasynyń, merdiger uıymnyń jáne jergilikti qaýymdastyq ókilderiniń qatysýymen qoǵamdyq tyńdaýlar ótkizgen. Sondaı-aq Alataý qalasynyń polıtsııasy tekserý júrgizip, onyń qorytyndysy boıynsha materıaldar Almaty oblysynyń ekologııa departamentine joldanǵan.
- Qaldyqtardy zańsyz kómý faktileri anyqtaldy. Qaldyqtar alynyp, qatty turmystyq qaldyqtar polıgonynda kádege jaratyldy. Quzyrly organdar tarapynan quqyqtyq baǵa berý nátıjeleri kútiledi, - delingen ákimdik jaýabynda.
Eske salaıyq, Qazaqstanda túziletin 4,5 mln tonna qaldyqtyń tórtten biri ǵana óńdeledi.
