Alataý qalasynda qandaı ınfraqurylymdyq jobalar iske asyrylyp jatyr
ASTANA. KAZINFORM — Premer-mınıstrdiń orynbasary Qanat Bozymbaev Alataý qalasynda qandaı ınfraqurylymdyq jobalar iske asyrylyp jatqanyn aıtty.
— Alataý qalasynyń ınfraqurylymyn damytý jónindegi Jol kartasy iske asyrylyp jatyr. Ol 28 jobany qamtıdy. Onyń ishinde 4 joba — elektrmen jabdyqtaý, 6 joba — sýmen jabdyqtaý jáne sý burý, 2 joba — jylýmen jáne gazben jabdyqtaý, 16 joba — jol ınfraqurylymy salasynda. Úkimet qaýlylaryna sáıkes ony iske asyrýǵa 2026 jyly 35,3 mlrd teńge bólindi, — dedi ol Quryltaı depýtattarynyń saýalyna bergen jaýabynda.
Vıtse-premer dereginshe, bir joba boıynsha qurylys jumystary aıaqtaldy. Qalǵan 27 joba boıynsha qurylys-montajdaý jumystary júrgizilip jatyr. 2026 jyldyń sońyna deıin olardyń 26-syn aıaqtaý josparlanǵan, al elektrmen jabdyqtaý salasyndaǵy bir joba 2027 jylǵa ótpeli sanalady.
— Elektrmen jabdyqtaý salasynda Zarechnyı, Jańatalap jáne Qoıanqus shaǵyn aýdandarynyń elektr jelilerin rekonstrýktsııalaý, sondaı-aq «Kokpa-1» qosalqy stantsııasyn jańǵyrtý jobalary iske asyrylyp jatyr. Qosalqy stantsııany jańǵyrtý jumystaryn aıaqtaý merzimi 2027 jyldyń II toqsanyna josparlanǵan. Sýmen jabdyqtaý jáne sý burý salasynda bir joba boıynsha qurylys-montajdaý jumystary aıaqtaldy. Bes joba boıynsha jumystar osy jyly aıaqtalatyn bolady, — dedi vıtse-premer.
Onyń atap ótýinshe, atalǵan jobalar qala eldi mekenderin sýmen jabdyqtaý jáne sý burý júıelerin damytýdy, rekonstrýktsııalaýdy kózdeıdi.
— Jol ınfraqurylymy salasynda 67,7 shaqyrym avtomobıl joldaryn ortasha jóndeý jáne 1,5 shaqyrym jańa jol salý jumystary júrgizilip jatyr. Atalǵan jumystardy 2026 jyldyń sońyna deıin aıaqtaý josparlanǵan, — dedi Qanat Bozymbaev.
Aıta keteıik, Alataý qalasyn damytýǵa baǵyttalǵan úsh strategııalyq qujat 2026 jyldyń sońyna deıin bekitilmek.
Sonymen qatar qala mektepteriniń birinde qozǵalysty jáne jabdyqtardyń jaı-kúıin baqylaıtyn júıe synaqtan ótip jatyr.
Al qalaǵa bilikti kadrlardy tartý úshin júıeli sharalar qabyldanady.
