Alataý qalasynda ekologııalyq avıa otyn óndirý ekojúıesi qurylady
ASTANA. KAZINFORM — Qazaqstan Respýblıkasynyń Premer-mınıstri Oljas Bektenov gonkongtyq Full Vision Capital kompanııasynyń negizin qalaýshy doktor Pıter Lımen kezdesý ótkizdi. Bul týraly Úkimettiń baspasóz qyzmeti málim etti.
Onda energetıka salasyndaǵy uzaqmerzimdi yntymaqtastyqtyń perspektıvalary, atap aıtqanda, ekologııalyq taza avıatsııalyq otyn óndirisin (Sustainable Aviation Fuel, SAF) damytý, zııatkerlik energetıkalyq sheshimderdi jáne energııany jınaqtaýdyń zamanaýı júıelerin engizý salasyndaǵy máseleler talqylandy.
Alataý qalasynyń aýmaǵynda alǵashqy tájirıbelik pılottyq jobany iske qosýǵa erekshe nazar aýdaryldy.
— «Alataý qalasynyń arnaıy quqyqtyq rejımi týraly» Konstıtýtsııalyq zań ınvestorlarǵa quqyqtyq aıqyndyqty, turaqty salyq jaǵdaılaryn jáne «bir tereze» rejımin usynady. Alataý qalasy tehnologııalar men sizdiń developerlik tájirıbeńizdi lokalızatsııalaý úshin pılottyq alań bola alady. Úkimet barlyq qajetti qoldaýdy kórsetýge daıyn, — dep atap ótti Oljas Bektenov.
Pıter Lı Full Vision Capital men Qazaqstan Respýblıkasy arasyndaǵy seriktestiktiń uzaqmerzimdi jáne aýqymdy modelin qurýǵa baǵyttalǵan odan arǵy yntymaqtastyq týraly óziniń kózqarasyn usyndy.
— Alataý qalasynyń „jasyl“ transformatsııasyn qoldaý maqsatynda Qazaqstan Úkimetimen yntymaqtastyq ornatý biz úshin úlken mártebe. Osy áriptestik aıasynda biz Alataýǵa, sondaı-aq Qazaqstanǵa da turaqty qala damýynyń jańa halyqaralyq standartyn qalyptastyrýǵa kómektesetin ınnovatsııalyq tehnologııalardy engizýdi kózdep otyrmyz, — dep atap ótti doktor Pıter Lı.
Kezdesý qorytyndysy boıynsha Alatau City Authority, Qazaqstan Respýblıkasynyń Energetıka, Aýyl sharýashylyǵy jáne Kólik mınıstrlikteri men Full Vision Capital kompanııasy arasynda Green Kazakhstan jobasy boıynsha ózara túsinistik týraly memorandýmǵa qol qoıyldy.
Qujat turaqty avıatsııalyq otyn óndirý boıynsha — aýyl sharýashylyǵy shıkizatyn ósirýden bastap ony qaıta óńdeýge jáne daıyn ónimdi shyǵarýǵa deıingi ıntegratsııalanǵan ekojúıeni qurýdy pysyqtaýdy kózdeıdi. Sondaı-aq taraptar energııamen jabdyqtaý senimdiligin arttyrý jáne jańartylatyn energııa kózderin ıntegratsııalaý úshin aqyldy energetıka men nıkel-sýtekti energııa jınaqtaý júıeleri salasyndaǵy sheshimderdi engizý múmkindikterin zerdeleıdi.
Premer-mınıstr salalyq memlekettik organdar men AlatauCity Authority-ge pılottyq jobalardy júzege asyrýǵa járdem kórsetýdi tapsyrdy.
Full Vision Capital kompanııasy doktor Pıter Lı negizin qalaǵan ınvestıtsııalyq-ınkýbatsııalyq platforma bolyp sanalady. Kompanııa «jasyl» ekonomıka men ozyq tehnologııalar salasyndaǵy jobalardy damytýǵa baǵyttalǵan. Kompanııa zııatkerlik energetıkalyq sheshimder men zamanaýı ekologııalyq tehnologııalar salasyna mamandanǵan. Doktor Pıter Lı — aktsııalary Gonkong qor bırjasynda aınalymda júrgen Henderson Land Group, The Hong Kong and China Gas Company Limited (Towngas) jáne Towngas Smart Energy Company Limited kompanııalarynyń dırektorlar keńesiniń tóraǵasy.
Aıta keteıik, Alataý Ortalyq Azııadaǵy alǵashqy tolyq ıntegratsııalanǵan tsıfrlyq shahar bolmaq.
